Filipçe: Një paciente 65-vjeçare ka ndërruar jetë nga virusi korona, gjithsej numri i të infektuarve ka arritur në 354
Një paciente 65-vjeçare nga Shkupi me probleme shëndetësore me mushkëritë e bardha, tension të lartë të gjakut dhe diabet është viktima e radhës nga virusi korona në Maqedoninë e Veriut, konfirmoi ministri i Shëndetësisë, Venko Filipçe, njofton Portalb.mk.
Në konferencën e rregullt për shtyp ai tha se në 24 orët e fundit ka 25 raste të reja me virus korona, me çka numri i përgjithshëm arriti në 354 persona të infektuar.
Përndryshe nga Klinika Infektive janë lëshuar dy pacientë, të cilët pasi janë testuar kanë dalë negativ dhe tani janë duke u mjekuar në shtëpi. Gjithashtu janë marrë edhe mostra nga 28 pacientë në Dibër, të cilët janë në mjekim shtëpiak dhe në gjendje stabile shëndetësore.
Dje në Klinikën Infektive janë pranuar 9 persona, atje tani ka gjithsej 59 pacientë, prej të cilëve 12 janë në gjendje më të rëndë, ndërkaq 5 janë vendosur në respiratorë.
Deri më tani janë bërë gjithsej 3.775 teste dhe sipas vendbanimit, deri më tani rastet me virusin korona në Shkup 183, Kumanovë 54, Dibër 47, Shtip 15, Tetovë 13, Prilep 12, Strugë 9, Veles 6, Manastir 4, Ohër 3, Kavadar 2, Gjevgjeli 2, Gostivar 1, Strumicë 1, Kriva Pallankë 1 dhe Koçan 1.
Për informata më të detajuara për situatën me virusin korona, klikoni në këtë link: http://gdi.mk/corona/
