Nënpresidenti i SHBA-ve, Mike Pence rezultoi negativ në testin e Covid-19
Nënpresidenti i SHBA-ve, Mike Pence ka rezultuar negativ në testin për koronavirusin e ri (Covid-19), të cilin e kreu pasi një punonjës i zyrës së tij doli pozitiv, transmeton Anadolu Agency (AA).
Rezultatet e testeve të Pence dhe bashkëshortes së tij Karen Pence i bëri të ditur nga llogaria e saj zyrtare në Twitter, Katie Miller, kryekëshilltarja për media e nënpresidentit Pence.
“Unë jam e lumtur të njoftoj se që të dyja rezultatet e testit për Covid-19, të nënpresidentit Pence dhe bashkëshortes së tij Karen Pence janë negative”, tha Miller në mesazhin e saj në Twitter.
Në një konferencë për media dje në Shtëpinë e Bradhë, duke rikujtuar se një punonjës në zyrën e tij rezultoi pozitiv në testin e Covid-19, nënpresidenti Pence tha se “Personi në fjalë nuk ka ardhur në punë që nga dita e hënë. Aktualisht gjendja e tij është e mirë. Nuk kam pasur ndonjë kontakt me të, por sërish unë dhe bashkëshortja ime do të bëjmë testin pasdite”.
Javën e kaluar edhe presidenti amerikan Donald Trump bëri testin për Covid-19 i cili gjithashtu rezultoi negativ.
Sipas të dhënave nga Universiteti “Johns Hopkins”, në SHBA numri i rasteve me Covid-19 ka arritur në 19.624 ndërsa numri i të vdekurve në 260.