Senati spanjoll do të votojë për anëtarësimin e RMV-së në NATO më 17 mars nëpërmjet video-konferencës

S. B. 20:46, 12-03-2020

Seanca e Senatit të Spanjës për të votuar protokollin për anëtarësim të Maqedonisë së Veriut në NATO, është caktuar për më 17 mars, njofton Portalb.mk.

Në këtë seancë do të jetë pika e vetme – votimi i protokollit, ndërkaq anëtarët të cilët do të munden do të jenë në sallë, të tjerët do të munden që të marrin pjesë në seancë plenare nëpërmjet video-konferencës, për shkak të virusit korona.

“Edhe krahas krizës rreth koronavirusit dhe pezullimit të të gjitha aktiviteteve tjera, Senati i Spanjës pak më herët vendosi që më 17 mars ta mbajë seancën plenare me pikën e vetme në rend dite: Ratifikimin e Protokollit inkuadrues për anëtarësimin e Maqedonisë së Veriut në NATO! Muchas gracias Espña!” ka shkruar ministri i Punëve të Jashtme Nikolla Dimitrov.

Procesi i ratifikimit të Protokollit nga shtetet anëtare erdhi pasi që ai fillimisht është nënshkruar më 6 shkurt në Bruksel, pas zgjidhjes së kontestit me Greqinë për ndryshimin e emrit dhe nënshkrimin e Marrëveshjes së Prespës. Pasi të gjitha vendet anëtare të NATO-s ta ratifikojnë Protokollin në Kuvendet e tyre, Maqedonia e Veriut do të bëhet anëtarja e 30 e NATO-s.

Ky Protokoll është ratifikuar nga 28-të shtetet anëtarë të NATO-s, ndërkaq votimi në Senatin e Spanjës është stacioni i fundit për anëtarësimin e Maqedonisë së Veriut në NATO.