Sela i pari në 6-she, Gashi te 2-shi, nesër pritet plotësimi i listave
Ziadin Sela, lideri i Aleancës për shqiptarë sot përkundër asaj se nuk arriti të finalizon listat e kandidatëve për deputet, ai konfirmoi se bartës liste në dy njësi zgjedhore do të jetë ai dhe partneri i koalicionit, Afrim Gashi, transmeton Portalb.mk.
“Unë do të jem bartësi i listës së kandidatëve në njësinë e gjashtë zgjedhore, ndërsa partneri ynë Afrim Gashi në njësinë e dytë zgjedhore”, deklaroi Sela.
Në Konventën e partisë sot në Gostivar u vendos që ai të përpilon listën përfundimtare e kandidatëve për deputet.
“Vendimin përfundimtar do ta marrim nesër”, deklaroi Sela.
Partitë e koalicionit, ASH-AAA kanë vendosur që në Njësinë 1 si bartës liste të jetë propozimi i AAA-së. Bartës në këtë njësi pritet të jetë Skender Rexhepi-Zejdi, i cili është sekretar gjeneral i Alternativës, dhe një nga themeluesit e saj.
Zyrtarisht deri më tani listat për deputet i kanë dorëzuar vetëm tre parti, Partia punëtore, Unioni demokratik qytetar dhe Votë për Maqedoninë. Propozimet mund të dorëzohen në KSHZ deri nesër në mesnatë, kur mbaron edhe afati për dorëzim.