Një kuti me mallëra në rrugë, për të siguruar pak bukë!

Ismail D. nga Shkupi është ndër ata shumë kryefamiljarë të cilët edhe në temperature minus 15 gradë Celsius që kanë kapluar Maqedoninë tenton të sigurojë bukën për gjashtë anëtarët e familjes së tij.

Vetë standardi i jetës së qytetarit të Maqedoninë flet se me shumë vështirësi e siguron kafshatën e gojës dhe me afro 32 për qind e popullsisë janë të pa punë, bazuar në shifra zyrtare.

Ismaili rrëfen për jetën e tij të rëndë dhe sfidat me të cilat ballafaqohet çdo ditë.

‘Unë çdo ditë nga ora 9 e mëngjesit e deri në orën 5 pasdite jam këtu në rrugë. Shes gjëra të ndryshme në të zezë, unë nuk kam mundësi të marr tezgë me qira dhe ta paguaj atë nga 5 mijë denarë në ditë, sepse aq të holla nuk i siguroj gjatë gjithë muajit. Shpesh ndodh të dëbohemi nga policia, të na marrin gjithë mallin dhe të na lënë pa asgjë’ thotë Ismail D.

Ai është nikoqiri i familjes gjashtë anëtarësh nga lagjja Dizhon, dhe i vetmi burim financiar në këtë shtëpi është kjo kuti e improvizuar në formë tezge.

‘Unë kam bashkëshorten dhe katër fëmijët, nuk marr as një ndihmë sociale nga shteti, fëmijët janë nëpër shkolla, shtëpia jonë është e vjetër. Jeta është shumë e vështirë, punoj me orë të tëra këtu, ndodh që në fund të ditës të mos kem fitim as 100 denarë. Me të vërtetë është shumë rëndë, qëndroni vetëm 5 minuta jashtë do të bllokoheni nga të ftohti, e ne çdo ditë këtu me orë të tëra në temperature minus 15 gradë, është katastrofë e madhe’ tha Ismaili.

Maqedonia me shkallë prej 31.4 për qind të papunësisë gjendet në vendin e 21-të në rang listën prej 199 vendeve të botës, kështu flasin të dhënat zyrtare të hulumtimeve botërore./Portalb