Përveç pronën e gjykatësve, Antikorrupsioni do ta kontrollojë edhe pronën e prokurorëve

Komisioni Shtetëror për Parandalimin e Korrupsionit (KShPK) përveç gjendjes pronësore të gjykatësve, do ta kontrollojë edhe atë të prokurorëve, konfirmoi për Portalb.mk, kryetarja e Antikorrupsionit, Biljana Ivanovska.

“Do të bëjmë kontroll edhe ndaj pronës së prokurorëve. Prokuroria nuk ka statistika siç ka Këshilli Gjyqësor për gjykatësit, megjithatë kemi lëndë për prokurorë ku ankohen palët, ku ne kemi vepruar për ndonjë lëndë dhe në mënyrë të pabazuar na janë hedhur poshtë, prokurorët e ish Prokurorisë Speciale dhe kështu do të bëjmë edhe atje”, thotë për Portalb.mk, Ivanovska.

Ajo shtoi se pavarësisht periudhës zgjedhore, sektori për kontrollim të gjendjes pronësore do të vazhdojë me punën.

Nga ana tjetër, Këshilli Gjyqësor ende nuk i ka dorëzuar të dhënat për gjendjen pronësore të gjykatësve. Sipas Ivanovskës, tërë procesi duhet të përfshijë rreth 100-150 gjykatës.

Derisa presin të dhënat, Antikorrupsioni do ta kontrollojë gjendjen pronësore të kryetarëve të gjykatave.

Lëndë e kontrollit do të jenë gjykatësit që përmenden në lëndët që janë dorëzuar deri te Antikorrupsioni, gjykatësit kundër të cilëve ka më shumë ankesa, ata që i ruajnë më së shumti, vjetërsojnë, apo rishpërndajnë lëndët, por edhe kundër atyre që ka procedurave disiplinore e kështu me radhë.

Ndikimi politik ndaj gjyqësorit është theksuar në Raportin e Stejt Departamentit të SHBA-së për të drejtat e njeriut për vitin 2018-të, i cili duke u thirrur në raportin special të PSP-së, kanë theksuar se katër gjykatës kanë lejuar që politika drejtpërdrejtë të përzihet në gjyqësor: kryetari i atëhershëm i Gjykatës Supreme, Jovo Vangellovski, i cili ka ndarë informata kyçe për rastet me politikanët dhe funksionarët për gjykim, ish kryetarja e Këshillit Gjyqësor, Aleksandra Zafirovska, e cila është konsultuar me ish përfaqësues të lartë qeveritar për zgjedhjen e gjykatësve lojal për politikën, ish gjykatësja Sofija Laliq, e cila i ka ndjekur udhëzimet e DSK-së dhe seriozisht e ka shkelur Kodin Etik të Gjykatësve dhe gjykatësja, Svetllana Kostova, e cila njëkohësisht ka punuar edhe si gjykatëse dhe ka qenë e punësuar në DSK.

Portalb.mk, ka disa muaj që shkruan për nevojë ne verifikimit të punës së gjykatësve dhe prokurorëve, të cilët janë në shënjestër të kritikave për shkak të punës së tyre të anshme, joprofeisonale, për të cilat është shkruar dhe thënë si nga faktori i brendshëm edhe nga ai ndërkombëtar.

Megjithatë, Këshilli Gjyqësor u “zgjua nga gjumi”, pasi kryeministrit Zoran Zaev, kërkoi që të vlerësojë përgjegjësinë e gjykatësve. Paralelisht me Këshillin Gjyqësor, gjykatësit do t’i kontrollojë dhe Antikorrupsioni.

Dhe ky është një lloj “vetingu”, pasi që atë sipas modelit të Shqipërisë nuk e lejoi Bashkimi Evropian.

Kritika të ashpra për gjendjen e gjyqësorit ka dhënë edhe presidenti Stevo Pendarovski në fjalimin e fundvitit në Kuvend, i cili porositi pushtetin e ri që do të zgjidhet nga zgjedhjet e parakohshme të 12 prillit të vitit 2020 që të fillojë me pastrimin e gjyqësorit, por fillimisht me pastrimin e politikanëve.

VETINGU është procesi që shërben për përjashtimin e zyrtarëve publik, të cilët nuk kanë integritet në përmbushjen e detyrës dhe në këtë mënyrë, rikthehet besimi i publikut në punën e institucioneve shtetërore. Procesi i vetingut, si rregull, kryhet duke kontrolluar figurën e dikujt përpara se t’i ofrohet një vend pune. Në varësi të vendit të punës ose të projektit, procesi i vetingut mund të bazohet në kontrollin e aftësive, personalitetit, pasurisë ose të ndonjë faktori tjetër që lidhet me qëllimin e vetingut.

Lexo gjithçka për reformat në gjyqësor, përfshirë edhe “vetingun”: KËTU