Sulm hakerësh në llogaritë zyrtare të Facebook në Twitter
Llogaritë zyrtare të Facebook në Twitter dhe Instagram u hakuan nga një grup i cili edhe në të kaluarën ka hakuar llogari të HBO, New York Times dhe disa ekipeve të futbollit Amerikan, shkruan PCWorld Albanian.
Një zëdhënës i kompanisë në rrjetin social Twitter tha se dy llogaritë e Facebook, @facebook dhe @messenger janë hakuar përmes një platforme të një pale të tretë ditën e Premte.
“Sapo u vumë në dijeni ne bllokuam llogaritë e kompromentuar dhe po punojmë me partnerët tanë për ti rikthyer ato,” tha një zëdhënës i kompanisë.
Llogaria në Instagram e gjigantit të medias sociale postoi një imazh me të njëjtin mesazh që ishte shfaqur edhe në Twitter, mesazh i cili vinte nga grupi i hakimit OurMine.
“Përshëndetje nga OurMine. Edhe Facebook mund të hakohet por siguria e tyre ishte më e mirë sesa e Twitter,” thuhej në mesazh. Grupi u lidh me hakimin e HBO dhe New York Times në 2017.
