Maqedonia e Veriut e mbështeti planin e SHBA-ve për çështjen Izrael-Palestinë
Qeveria e Maqedonisë së Veriut ka përshëndetur përpjekjet e SHBA-ve, nën udhëheqjen e presidentit Donald Trump, të paraqitura në planin për zgjidhjen e konfliktit izraelito-palestinez, transmeton Portalb.mk.
“Status quo nuk është i qëndrueshëm, shpresojmë që përmes bisedimeve do të mund të arrihet deri të zgjidhja e shumëpritur për dy shtetet, bazuar në vizionin për paqe në Lindjen e Afërt”, deklaruan nga Qeveria.
Ata i bëjnë thirrje liderëve të Izraelit dhe Palestinës që të shfrytëzojnë këtë moment për arritjen e zgjidhjes përmes bisedimeve.
“RMV përkushtohet për arritjen e paqes dhe stabilitetit afatgjatë në Lindjen e Afërt, zgjidhje të qëndrueshme dhe fer, që i respekton interesat legjitime të dy palëve dhe bazohet në rezolutat e Kombeve të Bashkuara”, theksojnë nga Qeveria e RMV-së.
Ndryshe, Presidenti i Shteteve të Bashkuara të Amerikës (SHBA), gjatë prezantimit të të ashtuquajturit plani i paqes për Lindjen e Mesme, njoftoi se Kudsi do të njihet si kryeqyteti i “pandarë” i Izraelit dhe se plani është shans i fundit për palestinezët.