Reagoi Arbër Ademi pas aktivitetit të ASH-së: Sukseset mbajnë vulën e BDI-së dhe Ali Ahmetit
Arbër Ademi, Ministri i arsimit në RMV reagoi sot pas aksionit simbolik të Forumit Rinor të Aleancës për Shqiptarët (FRASH), duke e konsideruar premtimin e tij si sukses ‘që mban vulën e BDI-së dhe të Ali Ahmetit’, transmeton Portalb.mk.
“Ju njoftoj se do kemi objekt të ri shkollor për nxënësit në Reçicë të Vogël, komuna e Tetovës dhe objekt të ri shkollor për nxënësit e fshatit Bllacë”, theksoi Ademi, duke premtuar se nxënësit e SHFK “Naim Frashëri” do të kenë kushte sipas standardeve evropiane.
Ai premtoi se nuk do të ketë më nevojë që nxënësit të kalojnë kufirin Kosovë – RMV që të shkollohen, pasi do të ndërtohet objekt i ri për shkollën, por pa saktësuar kur do të ndërtohet.
“Ata të cilët nuk kanë kapacitet, vizion dhe ide, sigurisht se nuk u mbetet tjetër, përveçse të kritikojnë kur bëhen punë të mira. Ne mbetemi të fokusuar në realizimin e kërkesave dhe nevojave të qytetarëve, maksimalisht të angazhuar për përmirësimin e standardit jetësor”, shtoi Ademi.
Ai publikoi edhe ilustrime se si do të duket shkolla.
Ndryshe, Forumi rinor i Aleancës për Shqiptarët (FRASH) ka zhvilluar aksion simbolik në vendin ku duhet të ndërtohet shkolla fillore në Reçicë të Vogël.
“Gjendemi këtu para shkollës fillore të lagjes Reçicë e Vogël, e cila siç u premtua në vitin 2013 u ndërtua nga donator kinez i cili është i pranishëm sot me ne në inaugurimin e kësaj shkolle. Mirëpo ashtu siç shihet, fatkeqësisht, donator kinezi si shumë mallra kineze doli se na paska qenë fallco”, thonë nga FRASH.
Ndryshe, së fundmi Ministri i Arsimit dhe Shkencës, Arbër Ademi në faqen e tij të Fejsbuk-ut publikoi vendimin për ndërtimin e objektit të kësaj shkolle, e cila do të ju shërbeje nxënësve të Shkollës Fillore “Naim Frashëri” të cilët deri sot kanë ecur me kilometra për të arritur në mësim.
Gazetari i Portalb.mk analizoi tenderin e publikuar në sistemin për furnizim publik, dhe informon se në qoftë se punët shkojnë sipas planit të parashikuar dhe nuk del ndonjë pengesë, nxënësit e Reçicës së Vogël vitin shkollor 2021 do të mund ta fillojnë në objektin e ri.
Meqenëse tenderi tanimë është publik, me datë 13 shkurt bëhet hapja e mundësisë që kompanitë të aplikojnë me ofertat e tyre për ndërtimin e shkollës, menjëherë pas kësaj në qoftë se nuk ka ankesa do të nevojiten 1 muaj për të nënshkruar marrëveshjen dhe të përmbyllen punët administrative që më pas në fillim të muajit prill të fillojnë punët për ndërtimin e shkollës.
Afati i paraparë për kompaninë që t’i përfundojë punimet për ndërtimin e shkollës është 17 muaj, andaj në qoftë se punët fillojnë në prill të këtij viti, të njëjtat pritet të përfundojnë në fillim të muajit shtator të vitit 2021.
Ndërtimi i shkollës fillore në Reçicë të Vogël, Tetovë, është një nevojë e madhe për të rinjtë e këtij vendi, në këtë vendbanim rreth 1000 nxënës i ndjekin mësimet disa kilometra larg shtëpive të tyre, një pjesë në Reçicën e Madhe dhe pjesa tjetër në shkollën “Naim Frashëri” në Tetovë.
Zgjidhja e këtij problemi u premtua disa herë, madje nga fushata e parë parazgjedhore e kryetares Arifi, por deri më tani nuk është ndërmarr asgjë në drejtim të aktiviteteve ndërtimore.
- LEXO: ASH: Arbër Ademi përpiqet të tallet me nevojën e banorëve të Reçicës së Vogël (FOTO)
- LEXO: Shkolla në Reçicë të Vogël u premtua 8 vite, pritet të hapet në shtator të 2021
- LEXO:Reçica e Vogël ende pa shkollë fillore, premtimi i Arifit mbeti vetëm fjalë
- LEXO:Mosndërtimi i shkollës në Reçicë të Vogël, ASH Tetovë: Arbër Ademi të japë dorëheqje
- LEXO:Bexheti: Reçicën e vogël do e bëjmë me shkollë fillore
- LEXO: Ministri Ademi foli për ndërtimin e shkollave në Idrizovë, Vizbeg, Reçicë dhe Bllacë