Kryetari i komunës në Rumani po hetohet pse kërkoi kontroll të lindjeve për prindërit romë

Organi shtetëror i mbikëqyrjes kundër diskriminimit po heton një kryebashkiak të Rumanisë, i cili u bëri thirrje autoriteteve të marrin kujdestarinë e fëmijëve të lindur nga prindërit romë me të ardhura dhe nivele arsimi nën një kufi të caktuar, shkruan Kallxo.com, transmeton Portalb.mk.

Këshilli Kombëtar Kundër Diskriminimit, një organ mbikëqyrës i shtetit, tha të martën se po heton Dorin Florea, kryetarin e qytetit verior të Targu Mures, pasi ai u bëri thirrje prindërve romë që t’i kontrollojnë të ardhurat dhe arsimin e tyre para se të bëjnë fëmijë.

Këshilli po shqyrton nëse do të fillojë procedura kundër Floreas për diskriminim dhe gjuhë të urrejtjes pasi ai i avokoi qëndrimet në një postim në Facebook.

Florea gjithashtu i tha një gazetari nga sajti Hotnews se masat mund të përhapnin “frikë” në të gjithë komunitetet rome në vend.

“Romët janë një problem serioz në Rumani dhe ne pretendojmë të mos e shohim atë,” tha kryebashkiaku në intervistën me “Hotnews”.

Ai gjithashtu deklaroi se romët “kanë mbetur të njëjtë” pasi u çliruan nga skllavëria në 1864 nga sundimtari rumun Alexandru Ioan Cuza.

Florea pretendoi se prindërit romë kanë fëmijë me “qëllimin e vetëm për të pasur burim të ardhurash” dhe kritikuan shtetin për “inkurajimin” e tyre që të mos punojnë.

“[Kjo] gjeneron krim të rritur, braktisje [të fëmijëve], mungesë arsimimi, etj”, shkroi ai në Facebook.

Asztalos Csaba, shefi i Këshillit Kombëtar Kundër Diskriminimit, tha se komentet e kryetarit mund të përbëjnë një rast diskriminimi dhe fjalimi të urrejtjes.

“Ne nuk kemi marrë ende një vendim pasi nuk kemi kryer seancat dëgjimore të nevojshme”, tha Csaba

Sulmet verbale ndaj popullatës rome nuk janë të rralla në Rumani, ku politikanët dhe figurat e tjera publike shpesh pretendojnë se ata janë të përfshirë në vjedhje, promovim të prostitucionit të anëtarëve të familjes, ose shfrytëzim të fëmijëve dhe trafikim.

Një tjetër kryetar komune në Rumani, Catalin Chereches i qytetit të Baia Mare në veriun e largët të vendit, bëri tituj ndërkombëtarë në vitin 2012 kur largoi me forcë disa familje rome nga ndërtesat ilegale në të cilat ata jetuan dhe i zhvendosi në një fabrikë të mëparshme kimike ku thuhej se ajri ishte shumë i ndotur.

Chereches ishte në qendër të një polemike tjetër në 2011 pasi ndërtoi një mur për të ndarë blloqet e apartamenteve të ndërtuara nga shteti, ku jetonin familjet rome, nga pjesa tjetër e qytetit.

Sipas vlerësimeve të Komisionit Evropian, rumunët me origjinë rome kanë tri herë më shumë të ngjarë të pësojnë varfëri dhe përjashtim social sesa bashkëqytetarët e tyre nga grupet e tjera etnike.

 

Regjistrimi i fundit kombëtar i realizuar nga qeveria rumune në vitin 2011 vendosi numrin e romëve në vend në 665 mijë megjithëse institucione të tjera vlerësojnë se popullsia rome është shumë më e lartë.

 

Sipas Këshillit të Evropës, janë gjithsej 1.85 milion rumunë me origjinë rome që paraqet më shumë se tetë për qind të popullsisë.