RMV, Qeveria e konstatoi tekstin e Propozim-ligjit për ratifikim të Marrëveshjes për NATO-n, pritet Spanja

Elida Zylbeari 16:42, 28-12-2019

Qeveria sot në mbledhjen e rregullt, të 174, e konstatoi tekstin e Propozim-ligjit për ratifikim të Marrëveshjes veriatlantike të nënshkruar në Uashington më 4 prill të vitit 1949, njofton Portalb.mk.

“Propozim-ligji për ratifikim të Marrëveshjes veriatlantike të vendit tonë me NATO-n, do të lëshohet për miratim në Kuvend dhe parasheh të hyjë në fuqi në ditën e publikimit në Gazetën Zyrtare të Republikës së Maqedonisë së Veriut, pas çka do të deponohet në Uashington, pasi që Spanja ta ratifikojë Protokollin për inkuadrim të vendit tonë me anëtarësim të barabartë në Aleancë”, kumtoi shërbimi qeveritar për shtyp.

Pritshmëritë ishin që RMV-ja anëtare e 30 e NATO-s do të bëhet në Samitin e Londrës, por kjo u pamundësua me shkuarjen e Spanjës në zgjedhje të parakohshme parlamentare. Pritet Spanja të krijojë qeverinë dhe të ratifikojë marrëveshjen.

Sekretari gjeneral Jens Stoltenberg ka deklaruar se Protokolli për hyrjen e RMV-së në NATO pret të ratifikohet në fillim të vitit 2020.

Procesi i ratifikimit të Protokollit nga shtetet anëtare erdhi pasi që ai fillimisht është nënshkruar më 6 shkurt në Bruksel, pas zgjidhjes së kontestit me Greqinë për ndryshimin e emrit dhe nënshkrimin e Marrëveshjes së Prespës. Pasi të gjitha vendet anëtare të NATO-s ta ratifikojnë Protokollin në Kuvendet e tyre, Maqedonia e Veriut do të bëhet anëtarja e 30 e NATO-s. Deri tash, procesi i ratifikimit të protokollit është finalizuar në 28 shtete.