Rohani propozon buxhet për “t’i rezistuar sanksioneve” amerikane
Presidenti i Iranit, Hassan Rohani ka prezantuar para parlamentit atë që e ka quajtur “buxhet për t’i rezistuar sanksioneve” dhe ka sugjeruar se një kredi e mundshme multi-miliardësh nga Rusia do të ishte burimi kyç i të ardhurave.
Draft-buxheti – që sipas vitit Persik fillon në mars të vitit 2020 – vjen pas presionit në rritje nga sanksionet e Shteteve të Bashkuara dhe iranianët ende po rimëkëmben nga trazirat vdekjeprurëse të muajit të kaluar, që u shkaktuan pas racionimit të naftës dhe uljes së subvencioneve, transmeton REL.
Rohani tha se buxheti që ka propozuar reflekton “varësin më të vogël të mundshme nga nafta”.
“Vitin e ardhshëm, ngjashëm si këtë vit, buxheti jonë do të jetë buxhet i rezistencës dhe ngadhënjimit ndaj sanksione”, u tha deputetëve Rohani.
“Ky buxhet e njofton botën se pavarësisht sanksioneve ne do ta menaxhojmë vendin, posaçërisht naftën”, tha ai.
Ekonomia e Iranit po përballet me sanksionet e ashpra amerikane, që prej se presidenti i SHBA-së, Donald Trump u tërhoq nga marrëveshja bërthamore e vitit 2015 dhe rivendosi sanksionet.
Buxheti i propozuar nga Rohani kap shifrën e 40 miliardë dollarëve apo 20 për qind më i lartë sesa buxheti i këtij viti.
