ShBA-të: Ndërsa Shqipëria përkujton solemnisht Ditën e Pavarësisë, ne ofrojmë ngushëllimet tona më të thella

Ndërsa Shqipëria përkujton solemnisht Ditën e Pavarësisë, ne ofrojmë ngushëllimet tona më të thella për ata që humbën jetën në tërmetin e kësaj jave, me këto fjalë sekretari amerikan i Shtetit, Mike Pompeo ka shprehur solidaritetin me Shqipërinë për ditët e vështira që erdhën pas tërmetit tragjik të 26 nëntorit.

“Ndërsa Shqipëria përkujton solemnisht Ditën e Pavarësisë, ne ofrojmë ngushëllimet tona më të thella për ata që humbën jetën në tërmetin e kësaj jave. Sot, lutjet tona janë me familjet e tyre, si dhe me ata të plagosur. Në emër të popullit amerikan, urojmë për të gjithë të plagosurit shërim të shpejtë. Edhe tani, ashtu si në periudha të tjera të vështira, Shtetet e Bashkuara janë me miqtë tanë në Shqipëri”, shprehet Pompeo në deklaratën për shtyp.

Që nga rënia e komunizmit tridhjetë vjet më parë, vijon Pompeo, Shqipëria dhe Shtetet e Bashkuara kanë zhvilluar një partneritet gjithnjë e më të fortë.

“Shtetet e Bashkuara mbështesin me ngulm rrugën e Shqipërisë drejt integrimit evropian dhe përgëzojnë vendosmërinë e Shqipërisë në ndjekjen e këtij qëllimi. Ne e përshëndesim përpjekjet e Qeverisë së Shqipërisë për të zbatuar reformat e nevojshme, përfshirë ato reforma që synojnë forcimin e një gjyqësori të pavarur. Ne vlerësojmë thellësisht kontributet pozitive të Shqipërisë në koalicionin e NATO-s dhe mirëpresim udhëheqjen e Shqipërisë si kryetari i OSBE-së 2020”, tha më tej Pompeo.

Pompeo thekson se miqësia ShBA-Shqipëri qëndron si një shtyllë e qëndrueshme e paqes dhe stabilitetit, dhe ne mezi presim për shumë vite të tjera miqësi dhe bashkëpunim.

Kjo vjen ngaqë sot është shënohet 107-vjetori i 28 nëntorit të vitit 1912, e kurse Shqipëria ka hyrë në ditën e tretë të tragjedisë së saj që erdhi pas tërmetit prej 6.3 ballësh më 26 nëntor të këtij viti.