VV insistoi për takimin e liderëve, LDK thotë se takimi do të ndodhë javën e ardhshme

Përkundër vullnetit për bashkëqeverisje, tashmë kanë kaluar dy javë nga takimi i fundit mes Lëvizjes Vetëvendosje dhe Lidhjes Demokratike të Kosovës për formimin e qeverisjes së ardhshme, transmeton KlanKosova.

Dy partitë mungesën e takimeve reciproke gjatë kësaj kohe nuk e konsiderojnë ‘ngërç’ në mes tyre, por kanë dallime në periudhën kohore se kur duhet të ndodhë përmbyllja e marrëveshjes bashkëqeverisjes.

Në VV kërkojnë që sa më parë të ndodhë ky takim, ndërsa në LDK thonë se takimi do të ndodhë kah mesi i javës së ardhshme, pas certifikimit të zgjedhjeve, pasi sipas tyre nuk mund të ketë ndarje të pushtetit pa e ditur saktë numrin e deputetëve.

Ky vakum katërmbëdhjetë ditësh pa takime për përfaqësues të shoqërisë civile është i panevojshëm.

Anëtarja e Kryesisë së Lëvizjes Vetëvendosje, Albulena Haxhiu thotë për KosovaPress se nuk i pengon asgjë mos certifikimi i rezultateve të KQZ-së për të diskutuar mbi disa tema që ka dallime.

Ajo i bën thirrje LDK-së që me të njëjtin intensitet të takimeve që kanë pasur grupet punuese të ndodhin takimet mes dy krerëve partiakë.

“Ne nuk kemi kërkuar asnjëherë që të nënshkruajmë marrëveshjen para se KQZ-së të certifikojë rezultatet zgjedhore. Mirëpo, nuk na pengon asgjë që ne të flasim për temat. Në këtë rast nëse kemi përfunduar më se 80 për qind të çështjeve programore, tash është diskutimi mbi ndarjen e ministrive dhe po ashtu çështja e dialogut me Serbinë, por edhe ndonjë çështje tjetër që grupi punues nuk ka gjetur pajtim. Prandaj unë nuk e kuptoj në qoftë se ka ndonjë hezitim nga ana e LDK-së se pse ka deklarata të tilla për sa kohë në takimet e brendshme që kemi pasur ka qenë jashtëzakonisht pozitiv. Prandaj, ne ftojmë ata që me intensitetin e njëjtë që kanë pasur grupet punuese të vazhdojnë edhe takimet e kryetarëve. Ne do të angazhohemi që takimi të ndodhë sa më parë”, thotë Haxhiu.

Më skeptik që takimi të ndodhë brenda kësaj jave shprehet zëdhënësi i LDK-së Besian Mustafa, i cili thotë se kjo mund të ndodhë kah mesi i javës së ardhshme, pasi që nuk mund të ketë një takim ku ndahen ministritë, pa pasur një informatë të saktë se sa deputetë i kanë dy partitë.

“Diku kah mesi i javës tjetër do të kemi edhe certifikimin e rezultateve nga KQZ-së, pastaj sa më shpejt që do të lejojë agjenda e dy liderëve, Mustafa dhe Kurti do të kemi edhe takimin e radhës për të bërë përmbylljen edhe të aspektit politik të marrëveshjes  të bashkëqeverisjes. Ky takim do të mbahet pas certifikimit të rezultateve. Nuk mund të kemi një takim ku ndajmë pushtetet, pra të kemi strukturën finale të qeverisë së ardhshme dhe ndarjen e pushteteve, ministrive në mes dy partive tona pa pasur një informatë të saktë se sa deputetë do të kemi si dy parti. A do të kemi 57 apo 61, kjo është mjaft e rëndësishme. Prandaj do të presim deri në certifikimin nga ana e KQZ-së që të kemi edhe konfirmimin e ulëseve në Parlament”, thotë Mustafa

Analisti politik, Arton Demhasaj këto vonesa i sheh si një tendencë të LDK-së për ta parë në një pozitë më të butë Lëvizjen Vetëvendosje, në mënyrë që të rriten apetitet për postet ministrore.

“Nuk është nevoja të pritet certifikimi i rezultateve, por thjesht duhet të mbahen takime për diskutimet e tyre për përafrimin e programeve e tyre politike. E njëkohësisht për krijimin e plan-programit qeverisës dhe ndarjen e resurseve qeveritare mes këtyre dy subjekteve politike. Që në momentin kur kemi shpalljen ose certifikimin e rezultateve finale të KQZ-së, këto të jenë të gatshme dhe menjëherë të mos ketë vonesa të tjera…Potencialisht, LDK pret këtë që të sheh një pozitë pak më të butë të VV-së nga ana e numrit të deputetëve që kjo pastaj të shndërrohet tek ajo ndarja e posteve ministrore që i bëjnë këto dy subjekte politike”, thotë Demhasaj.

Në zgjedhjet e 6 tetorit, Lëvizja Vetëvendosje sipas rezultateve të KQZ-së ka dalë e para, pasuar nga LDK.

Këto dy parti kanë mbi një muaj që po tentojnë formimin e qeverisjes së ardhshme. Ndërsa, pas vendimit të fundit të PZAP-së dhe Supremes me largimin nga votat e përgjithshme të fletëvotimeve nga Serbia, koalicioni Nisma-AKR-PD momentalisht është mbi pragun zgjedhor.

Lajme të ngjashme

Leave a Reply

Your email address will not be published. Required fields are marked *

Back to top button