United mposht liderin në shtëpi (VIDEO)
Manchester United është fitues i kryendeshjes së xhiros së nëntë në Ligën Premier. Djajtë e Kuq kanë triumfuar përballë Chelseat në Stamford Bridge me rezultat 3-2.
Rezultati u zhbllokua në minutën e katërt të sfidës me një autogol të David Luiz, i cili ia dha epërsinë skuadrës mysafire.
Një dështim të mbrojtjes së Bluve e shfrytëzoi Antonio Valencia për ta gjetur Robin van Persien të pamarkuar, ndërsa holandezi e dyfishoi epërsinë e United (12’).
Me një gjuajtje të lirë të saktë, Juan Mata i ktheu në lojë vendasit pa përfunduar pjesa e parë (44’).
Nuk kaluan shumë minuta brenda gjysmës së dytë (53’) dhe Chelsea barazoi. Oscar pranoi një top nga Mata dhe krosoi te Ramires, ndërsa mesfushori brazilian e nivelizoi takimin.
Në vazhdim të takimit gjërat u përkeqësuan për Blutë. Branislav Ivanovic u përjashtua me karton të kuq pas ndërhyrjes në Young që shkonte drejt golit (63’), ndërsa menjëherë pas edhe Fernando Torres u përjashtua me kartonin e dytë të verdhë (68’).
Djajtë e shfrytëzuan epërsinë numerike në fushë për ta shënuar golin e fitores. Javier ‘Chicharito’ Hernandez ishte realizuesi (75’), ndërsa lojtarët vendas reaguan për një pozitë jashtë loje.
Kjo fitore e pozicionon Manchester Unitedin në vend të dytë me pikë të barabarta me rivalin lokal, Manchester City, që gjendet një vend më poshtë, ndërsa dy klubet nga Mançesteri e ndjekin Chelsean me një pikë diferencë. /Telegrafi/
