Juncker: Të mbahet premtimi për Shqipërinë dhe Maqedoninë e Veriut

Presidenti i Komisionit Europian, Jean-Claude Juncker tha se Maqedonia e Veriut dhe Shqipëria kanë bërë përparime thelbësore. Gjatë fjalës së tij në Parlamentin Evropian me rastin e debatit për përgatitjet për Këshillin Evropian të 17-18 Tetor 2019, Juncker kërkon që të mbahet premtimi me vendet e Ballkanit Perëndimor, transmeton Portalb.mk.

Juncker: Maqedonia Veriore dhe Shqipëria kanë bërë përparim thelbësor. Kjo është arsyeja pse Presidenti Sassoli, Presidenti Tusk, Presidentja e zgjedhur Von der Leyen dhe unë u shkruajtëm një letër Shteteve Anëtare duke i ftuar ata të bëjnë atë që u premtuan vendeve të Ballkanit Perëndimor  veçanërisht Shqipërisë dhe Maqedonisë së Veriut.

Marrëveshja e Prespës mes Maqedonisë së Veriut dhe Greqisë, por edhe reformat e guximshme që ka ndërmarrë Shqipëria,  duhet të na lejojnë që ti hapim negociatat, tha kreu i KE.

Juncker: Nëse Evropa ka një vullnet të fortë, gjithmonë ekziston një mënyrë për të arritur qëllimet e dakorduara zakonisht. Unë e marr shembullin e marrëveshjes së Prespës midis Maqedonisë së Veriut dhe Greqisë – korniza evropiane dhe perspektiva evropiane kanë ndihmuar për të siguruar që një konflikt dhjetëvjeçar zgjidhet përfundimisht. Dhe reformat që Shqipëria ka ndërmarrë me guxim, na lejojnë të parashikojmë në një mënyrë të favorshme  hapjen e negociatave të pranimit.