Janeva nuk ka dhënë dëshmi, pasi kërkoi t’i shohë dëshmitë
Për më pak se një orë, ka përfunduar marrja në pyetje e ish kryeprokurores speciale Katica Janeva nga shefja e Prokurorisë Themelore Publike për ndjekjen e krimit të organizuar dhe korrupsionit, Vilma Ruskoska në lëndën “Reket”, transmeton Portalb.mk.
“Ajo ishte e ftuar të merret në pyetje si e dyshuar. Ajo do ta shfrytëzojë të drejtën për të pasur qasje në dëshmi, pas kësaj do të japë deklaratë”, tha avokatja e saj, Irena Fërçkovska.
Kontrollin ndaj dëshmive të saja, Janeva do ta fillojë nga dita e enjte.
Nga burgu i Shuto Orizares ku gjendet në paraburgim, Janeva në Prokurori u soll e shoqëruar nga katër policë.
Pas analizës së përgjithshme të materialeve të mbledhura, Prokuroria dje njoftoi se prokurori publik i Prokurorisë për Krim të Organizuar dhe Korrupsion që vepron në lëndën “Reket”, e ka mbaruar procedurën hetimore për personat e dyshuar.
Ashtu siç njoftuan, të dyshuarit kanë afat prej 15 ditëve që t’i shohin provat dhe kanë të drejtë të propozojnë prova në dobi të të dyshuarve.
“Njëkohësisht, Prokuroria thekson se dëshmia e personit të dyshuar nuk është veprim procesual, që nënkupton se mbrojtja, gjegjësisht dëshmi, mund të jepet edhe në afatin e caktuar kohor kur kryhet ekspertizë të provave. Gjatë ditës së ardhshme do të ftohet edhe e dyshuara e tretë, e cila njëkohësisht do të informohet edhe për mbarimin e procedurës hetimore”, thonë nga Prokuroria.
I dyshuari i parë në rastin “Reket”, Bojan Jovanovski (Boki 13), dje nuk ka dhënë dëshmi përpara prokurores Villma Ruskovska, pasi që nuk i është mundësuar që t’i shohë provat kundër tij.
“Bojan Jovanovskit nuk i është mundësuar t’i shohë të gjitha provat. Ai sot ka qenë i ftuar që të japë dëshmi, dhe jo në atë dëshmi të futet njoftim për hetim të mbaruar”, tha avokati i Jovanovskit, Sasho Dukovski.
Ai gjithashtu ka deklaruar se “në historinë e gjyqësorit të Maqedonisë së Veriut nuk ka ndodhur, që në të njëjtën ditë të miratohet vendim për mbarimin e hetimit dhe të kërkohet deklaratë nga person i dyshuar i cili paraprakisht asnjëherë nuk ka qenë i njoftuar për provat kundër tij”.
Zoran Milevski – Kiçeec, ka dhënë deklaratë, ndërkaq jozyrtarisht i njëjti ësht ëmbrojtur në heshtje.
Përndryshe, në lëndën për zhvatjen të dyshuar janë dy persona, Bojan Jovanovski i njohur me nofkën “Boki 13” dhe Zoran Milevski i njohur si Zoki Kiçeec se kanë zhvatur biznesmenë nëpërmjet prokurorit publik, apo shefes së PSP-së në dorëheqje, Katica Janeva. Së fundmi gazeta italiane ka publikuar disa video-audio materiale, në të cilat tregohet se si Boki 13, ka marrë reket prej Orce Kamçevit në shtëpinë e tij. Skandali përfshin edhe prokuroret Janeva dhe kolegen e saj, Lile Stefanova, por të dyja i kanë refuzuar akuzat.
LEXO PËR LËNDËN: REKET
