Sarandë, mbi 260 mijë turistë në 7 muaj
Saranda është një ndër qytetet më mikpritëse të turistëve të huaj, të cilët po shijojnë verën duke eksploruar bregdetin shqiptar.
Këtë gjë e vërtetojnë edhe statistikat për janar-korrik 2019 në portin e Sarandës, ku vihet re një fluks i shtuar i udhëtarëve vendas e të huaj.
Drejtoria e portit të Sarandës bën të ditur për ATSH-në se “gjatë shtatë muajve të parë të vitit me tragetet e linjës Sarandë-Korfuz, anije turistike si dhe kroçera kanë në hyrë në portin e Sarandës 265 973 udhëtarë”.
Sipas portit, gjatë kësaj periudhe numri i hyrjeve të udhëtarëve ka qenë 134, 952 udhëtarë, ndërsa numri i daljeve 131, 021 udhëtarë.
“Vitin e kaluar në të njëjtën periudhë janar- korrik 2018, numri i udhëtarëve ishte 238 696, ku 121, 792 ishin hyrje në portin e Sarandës dhe 116,904 ishin regjistruar në dalje”, bën të ditur porti.
Krahasuar me vitin e kaluar është shënuar një rritje prej 27 277 udhëtarë, që kanë mbërritur në portin në jug të vendit.
Saranda, e ndodhur në gjirin e detit Jon konsiderohet si një vendet më të bukura të rivierës shqiptare. Ajo po tërheq gjithnjë e më shumë turistët e huaj, ku vetëm për këtë vit në portin e qytetit bregdetar kanë rezervuar 42 kroçera.
