Metallica dhuroi 250 mijë euro për spitalin e fëmijëve në Rumani
Grupi muzikor amerikan Metallica ka dhuruar 250 mijë euro për spitalin e fëmijëve në Rumani, transmeton Anadolu Agency.
Sipas lajmit të “Emerging Europe”, Metallica para koncertit që do të zhvillojë në kryeqytetin rumun, Bukuresht, njoftoi se i ka dhuruar 250 mijë euro organizatës “Daruieste Viata”, e cila po ndërton spitalin e parë Onkologjik Pediatrik të vendit.
Bëhet e ditur se Metallica donacionin e ka kryer nëpërmjet fondacionit jofitimprurës “All Within My Hands”.
Spitali i Radioterapisë Onkologjike dhe Pediatrike do të jetë spitali i parë në Rumani që do të jetë i specializuar në pediatrinë onkologjike.
Në këtë spital do të mund të bëhen çdo vit 9 mijë e 600 operacione onkologjike dhe jo onkologjike, si dhe do të mund të trajtohen më shumë se 300 fëmijë me kancer.
Ndërtimi i spitalit ka filluar në vitin 2018 dhe pritet të hapet në vitin 2020.