Basha publikoi videon, flet për të keqpërdorurit e Teatrit dhe për aferën e 6 kullave 200 mln euro
E ndërsa kryeministri Rama përpiqet që nëpërmjet artistëve të bindë qytetarët se një Teatër i ri është i domosdoshëm, kryeopozitari Basha vijon me denoncimet sipas të cilave pas këtij projekti fshihet një aferë e madhe korruptive, njofton TCH.
Basha i konsideron artistët që janë rreshtuar në krahë të idesë për shembjen e Teatrit si të keqpërdorurit e radhës, ndërsa deklaron se puna e Teatrit ishte vetëm loja, për të shplarë 200 milionë euro e për të ndërtuar 6 kulla në Tiranë.
“Puna e Teatrit ishte loooja! Nuk e zë gjumi hajdutin psiqik për 6 kullat 200 milionë euro! Mjerë të keqpërdorurit e radhës që flasin për gishtin kur gishti tregon hënën! Nuk ka interes për Teatrin Pa Kulla treshja Rama-Veliaj-Mafia e Ndërtimit dhe Drogës”, shkruan Basha në Facebook.
Po të njëjtën video denoncuese, Basha e ka shpërndarë një ditë më parë në Facebook, por me një tjetër koment.
“Asnjë fjalë për bankomatin e tij privat Vangjush Dakon nuk belbëzon sot Edi Rama, ky artist i mashtrimit. Por vazhdon të mashtrojë për aferën e 6 kullave 200 milionë euro. Çdo gjë që thotë, është mashtrim, pasi qëllimi i tij i vetëm është të vjedhë. Shikoni më poshtë si mashtron hajduti psiqik për Teatrin”, shkruan Basha në Facebook.
