Janë arrestuar dy doganierë të Tabanocit për ryshfet, u gjetën me mijëra euro e qindra franga
Për shkak të dyshimeve se kanë marrë ryshfet, nga liria janë privuar dy doganierë të vendkalimit kufitar në Tabanoc, transmeton Portalb.mk.
Siç njoftuan nga Drejtoria “Doganat e Maqedonisë”, arrestimi ka ardhur pas padisë për kryerje të veprës penale “Pranim të ryshfetit”.
“Më 28 korrik 2019, në ora 03:00 është pranuar njoftimi nga personi i dëmtuar për dhënie të ryshfetit te doganierët në VK Tabanoc, gjatë hyrjes në Republikën e Maqedonisë së Veriut, pas çfarë, është vepruar menjëherë, dhe pas bastisjes të doganierëve Z.J. nga Hotla dhe T.M. nga Kumanova, dhe pas bastisjes në hapësirat e Drejtorisë së Doganave në VK Tabanoc, janë gjetur 1670 euro dhe 190 franga zvicrane”, njoftuan nga “Doganat e Maqedonisë”.
Nga atje njoftuan se ndaj doganierëve do të zhvillohen procedura shtesë për aktakuzë.
