Presidenti i Austrisë i dha “Dekoratën e Lartë të Nderit” biznesmenit Samir Mane

Dje në mbrëmje u takua biznesmeni shqiptar Samir Mane me ambasadorin austriak Johann Sattler, raporton Portalb.mk.

Mane mori nga ambasadori i Austrisë në vendin tonë një ndër vlerësimet më të larta shtetërore austriake, “Dekorata e Lartë e Nderit për Shërbime ndaj Republikës së Austrisë”, akorduar nga presidenti austriak.

Ambasadori Sattler u shpreh gjatë dhënies së dekoratës se: “Austria është një nga lojtarët më të rëndësishëm në ekonominë shqiptare dhe ju keni luajtur një rol të jashtëzakonshëm në këtë histori suksesi me investimet tuaja, nga qendrat tregtare e deri në turizëm, nga agrobiznesi në industrinë minerare. Ju keni bërë lidhjen ndërmjet vendeve tona. Gjithashtu, ju jeni një investitor rajonal i njohur në Ballkan dhe nje kontribues në shoqëri duke i kthyer komunitetit atë për të cilën ka shumë nevojë ky vend”.

Presidenti i Grupit Balfin, Mane tepër i nderuar nga ky vlerësim që iu bë, duke falënderuar Presidentin e Austrisë u shpreh: “Lidhjet e mia me Austrinë janë shumë te forta. Unë erdha në këtë vend si emigrant dhe u ktheva si biznesmen pas 14 vjetësh duke më ofruar një mundësi shumë të madhe. Bërja e biznesit në Austri më ka ndihmuar shumë për zhvillimin e biznesit në vende të ndryshme, përfshi Shqipërinë dhe jam i sigurt që edhe në të ardhmen bashkëpunimi ynë do të vijojë të jetë i shkëlqyer”.

Samir Mane i hodhi hapat e tij të parë me kompaninë AlbaTrade në Vjenë të Austrisë në vitin 1993 dhe sot ai është president i Grupit Balfin që numëron mbi 5 mijë punonjës në Shqipëri, rajon dhe më gjerë.