Gjashtë shtëpitë e shëndetit i kanë në përdorim autoambulancat e reja
Ministria e Shëndetësisë, por edhe disa nga qendrat shëndetësore që kanë shërbim të ndihmës së shpejtë, njoftuan se autoambulancat e reja tashmë janë në përdorim, njofton Portalb.mk.
Bëhet fjalë për gjashtë autoambulancat, pjesë e pakos së 12 autoambulancat për të cilat u nënshkrua tender në dhjetor të 2018-s, dhe që duhej të shpërndaheshin në: Kërçovë, Dibër, Strugë, Krushevë, Kriva Pallankë dhe Berovë. Gjashtë veturat e tjera i ka Shtëpia e Shëndetit e Shkupit.
“12 veturat e reja të cilat Ministria e Shëndetësisë i bleu për fuqizim të kapacitetit të Ndihmës së Shpejtë tashmë janë në funksion në të gjitha shërbimet në të cilat janë shpërndarë”, njoftuan nga Ministria e Shëndetësisë.
Nga ana tjetër, drejtori i Shtëpisë së Shëndetit të Kërçovës, Xhabir Bajrami për Portalb.mk konfirmoi se autoambulanca e re është në përdorim.
“Po, është në përdorim. Ka dy ditë që e kemi regjistruar dhe e kemi futur në përdorim”, tha Bajrami.
Se veturat janë në përdorim, e konfirmuan edhe nga Spitali i Përgjithshëm me veprimtari të zgjeruar i Dibrës: “Po e kemi në pëdorim. Ka dhjetë ditë e kemi marrë dhe tashmë është në funksion”.
Kërçova vazhdon ta përdor “rekordmenen në amortizim”
Kërçova në krahasim me shtëpitë tjera të shëndetit posedonte autoambulancë me kilometrazh të kaluar prej mbi 1 milion. Siç bëri të ditur Bajrami, “rekordmenia e amortizimit” vazhdon të jetë në përdorim.
“Atë e kam në servisim, pres që së shpejti ta marr. Pres të mbarojë servisimi, dhe ta lëshojmë, të na gjendet edhe ajo, se po e ngarkuam këtë të rejën, kam frik se mos na prishet”, tha Bajrami.
- LEXO: Ndihma e Shpejtë në Maqedoni duhet të ndryshojë emrin në Ndihmë me vetura të vjetra (Infografik)
- LEXO: Autoambulancat në RMV me vjetërsi mesatare mbi një dekadë
Të dhënat treguan se RMV-ja ka vetura shëndetësore të vjetra prej më shumë se 1 dekadë, e ndërkaq ekspertët e konsultuar nga Portalb.mk, të cilët më parë janë marrë me servisimin e veturave të autoambulancave të Ndihmës së Shpejtë, kanë vlerësuar se kriter i ndërrimit dhe servisimit të autoambulancave duhet të jetë përdorimi i veturave dhe kilometrazhi i kaluar. U kërkua që të ketë rregullore të veçantë për servisim dhe ndërrim të autoambulancave. Sipas të njëjtit, një autoambulancë e Ndihmës së Shpejtë nuk duhet të ketë më shumë se 10 vjet përdorim.
Analiza e fizibilitetit assesi të përfundojë
Për analizën e fizibilitetit e cila duhet të japë zgjidhje për funksionimin e mëtutjeshëm të shërbimit të Ndihmës Mjekësore të Shpejtë, dhe që duhej të përfundonte në qershor, ende vazhdojnë punimet.
“Analiza e fizibilitet për Ndihmën Mjekësore të Shpejtë ende po punohet, dhe pas përfundimit do t’i prezantohet publikut”, thanë nga Ministria e Shëndetësisë.
Realizimi i analizës së fizibilitetit me partneritet publik-privat ngjalli reagime të shumta në publik, pasi që sipas mjekëve, ajo mund të dërgojë në privatizimin e ndihmës së shpejtë. Privatizimi sipas të njëjtëve do ta shkatërrojë mbrojtjen shëndetësor.
Ministri i Shëndetësisë, Venko Filipçe ka njoftuar se në shërbimin e Ndihmës Mjekësore të Shpejtë në periudhën që do të vijojë do të ketë edhe punësime, që të mënjanohet edhe një tjetër problem tjerë, mungesa e kuadrit profesional.
