Meritat janë në anën e Shkupit dhe Tiranës, por vendimi është i Brukselit

S. B. 10:32, 18-06-2019

Maqedonia e Veriut dhe Shqipëria janë të gatshme. Në interes tonë është që Ballkani Perëndimor të bëhet pjesë e komunitetit, porositi përfaqësuesja e lartë e Bashkimit Evropian për punë të jashtme dhe siguri, Federika Mogerini. Optimizmi ekziston edhe në Qeverinë e Maqedonisë së Veriut. Zv/kryeministrja, Radmilla Shekerinska është e sigurt se këtë vit do t’i fillojmë negociatat me BE-në, njofton Portalb.mk.

“Të dy vendet janë vende evropiane, ato nuk janë jashtë kufijve të BE-së. Në interes tonë është që Ballkani Perëndimor të bëhet pjesë e komunitetit”, porositi Mogerini dje nga Luksemburgu.

Sipas Mogerinit, besimi në procesin e zgjerimit të BE-së, do të pësonte nëse nuk do të fillonin bisedimet hyrëse menjëherë me dy vendet, ndërkaq Unioni nuk duhet të heq dorë nga instrumenti më efikas për arritjen e paqes. Ajo shpreson se vendet e BE-së do të sjellin vendim të mençur që urgjentisht të fillojnë bisedimet.

Zv/kryeministrja Shekerinska pret që në konkluzionet e Këshillit të BE-së të konstatohet se i kemi plotësuar të gjitha kushtet dhe se të gjitha ato do të përkrahen nga të gjitha vendet anëtare të BE-së.

Ministrja e Mbrojtjes e Maqedonisë së Veriut, Radmilla Shekerinska/ Foto: Husamedin Gina – Anadolu Agency

“Nuk ekziston asnjë argument dhe alibi që dikush të nxirret dhe të thotë se kjo ose ajo nuk ësthë kryer dhe kjo mendoj na i forcon pozitat pasi që ai nuk është qëndrim vetëm i Komisionit, por do të jetë edhe qëndrim i vendeve anëtare. Atë patjetër duhet që ta garantojmë në konkluzionet nga Këshilli”, theksoi dje Shekerinska.

Në lidhje me qëndrimin e Holandës për Shqipërinë, ministrja tha se Holanda e ka atë kufizim dhe se ajo, sipas saj, nuk do të ndryshojë në qershor ose korrik.

“Ne duam që të dy vendet t’i fillojnë bisedimet pasi që mendojmë se është më e dobishme. Megjithatë, në ndonjë moment të caktuar secili vend e ka përgjegjësinë e vet që ta shtyjë agjendën integruese. Franca sheh se tani nuk është patjetër të dalë me përgjigje pasi që Gjermania nuk ka kohë që të vendosë”, tha Shekerinska.