OKB-ja e shqetësuar me tensionet në Kosovë

Sekretari i Përgjithshëm i OKB-së, Antonio Guterres, është shprehur i shqetësuar në lidhje me tensionet mes Kosovës e Serbisë dhe ka bërë apel tek të dyja palët që të përmbahen nga deklaratat dhe provokimet nxitëse që mund të provokojnë rrëmujë dhe ka kërkuar që, pa vonesë, të heqin të gjitha barrierat për vazhdim të dialogut., transmeton Koha.net.

“Tensionet serioze mes Beogradit dhe Prishtinës edhe më tej paraqesin barriera për vazhdim të dialogut produktiv dhe nxisin shqetësim mes zyrtarëve lokalë dhe ndërkombëtarë për shkak të përkeqësimit të mundshëm të stabilitetit”, thuhet në raportin e ri të Sekretarit të Përgjithshëm të OKB-së për gjendjen në Kosovë, i cili do të trajtohet më 10 qershor në seancën e Këshillit të Sigurimit të OKB-së.

Duke kërkuar që të hiqen barrierat për vazhdim të dialogut, Guterres ka thënë se taksat ndaj mallrave nga Serbia janë ende në fuqi, sikurse edhe paralajmërimet e presidentit të Serbisë, Aleksandar Vuçiq, për kundër-masa ndaj Prishtinës nëse nuk hiqet taksa.

Guterres ka theksuar se nga raportimi i tij i fundit, nuk është zhvilluar asnjë takim mes përfaqësuesve të Kosovës e Serbisë nën udhëheqjen e BE-së, ndonëse në fund të prillit dy palët u takuan në samitin e Berlinit të organizuar nga Gjermania dhe Franca.

Shefi i OKB-së thotë se nga raporti i tij i fundit, rrjedhimisht në gjashtë muajt e fundit, “në Kosovë janë kthyer 43 persona, nga të cilët 34 janë serbë”.

Theksohet po ashtu se në gjashtë muajt e fundit kanë ndodhur disa incidente në vendbanimet me etni të përziera.

Nga miratimi i Rezolutës 1244 të KS të OKB-së më 1999, Këshilli i Sigurimit ka zhvilluar nga katër seanca në vit për Kosovën, por, me kërkesë të SHBA-së dhe Britanisë, raportimet e ardhshme do të jenë dy herë në vit.