Çfarë ndodhi në protestën e sotme të opozitës, mesazhet mes fotove, mungoi gazi lotsjellës
Pak më shumë se dy orë zgjati protesta e sotme e opozitës.
Ajo nisi me një marrshim drejt kryeministrisë rreth orës 19:00, ndërsa në ndryshim nga 5 protesta e mëparshme kjo ishte më paqësore, transmeton Gazeta Express.
U përdorën vetëm disa kapsolle dhe tymuese, u hodh pak bojë mbi kryeministrinë, ndërsa policia vetëm në një rast përdori ujë, u evitua hedhja e gazit lotsjellës.
Përgjithësisht u dëgjuan në korr thirrjet “Rama ik”, ndërsa si përherë ishte Basha ai që e mbylli protestën në selinë e Partisë Demokratike.
Teksa protesta u zhvendos para parlamentit, protestuesit hodhën gurë dhe shashka drejt policisë.
Ndërsa nga ana e policisë pati reagim me ujë, për herë të parë në 6 protesta e opozitës sot nuk u përdor gaz lotsjellës.
Situata u tensionua edhe më tej me një grup protestuesish, të cilët shkulën pllaka dhe gurë nga rruga duke ia hedhur ato forcave të policisë. Për të qetësuar turmën ndërhyri sekretari i përgjithshëm i PD Gazmend Bardhi dhe të rinjtë e FRPD.
“Këtë betejë e nisëm për Shqipërinë si gjithë Europa, Europa e dëgjoi zërin tonë dhe tani është koha për zgjidhje politike, largimin e Edi Ramës, qeveri tranzitore, zgjedhje të lira dhe të ndershme, për t’i dhënë fund parlamentit të krimit, e vetmja rrugë për të hapur dyert e Europës.
Shkaktari do të largohet, vetëm kjo do t’i hapë rrugë zgjidhjes politike. Tani këtë e di dhe Europa, e di bota. Rama ik, hapi rrugë zgjidhjes politike. Beteja jonë po shkon drejt fundit që paracakton historia për kombet që e nuk e pranojnë të keqen, po shkon drejt konkluzionit , drejt çlirimit të Shqipërisë nga krimi, po shkon drejt stacionit tonë për Shqipërinë si gjithë Europa.
Teksa zëri ynë u dëgjua dhe bota hapi sytë, kërkesa ime është të qëndrojmë në këmbë dhe gati për ta çuar misionin tonë deri në fund”, tha Basha në mbyllje të protestës.
