Avioni i spiunazhit i Portugalisë gabimisht ka shkelur hapësirën ajrore të Finlandës
Avioni i spiunazhit i Portugalisë gabimisht ka shkelur hapësirën ajrore të Finlandës, njoftuan nga Forcat Ajrore të Portugalisë, transmeton Anadolu Agency (AA).
Forcat ajrore bëjnë të ditur se avioni i spiunazhit “gabimisht” ka shkelur hapësirën ajrore të Finlandës.
Sipas njoftimit, avioni P-3 i llojit Orion që gjendej në Poloni, pa qëllim ka fluturuar rreth 500 metra në hapësirën ajrore të Finlandës.
Zëdhënësja e Ministrisë së Mbrojtjes së Finlandës, Niina Hyrsky, dje kishte njoftuar se avioni portugez i spiunazhit ditë më parë ka shkelur hapësirën ajrore të Finlandës në jugperëndim të kryeqytetit Helsinki.
Ajo tha se rasti është duke u hetuar nga rojet kufitare finlandeze.
Ndërsa nënkoloneli Manuel da Costa, zëdhënësi i forcave ajrore portugeze, tha se zyrtarët finlandez kanë informuar Portugalinë rreth shkeljes dhe se kanë nisur hetim rreth rastit.
Ai shtoi se një avion i spiunazhit P-3 aktualisht është duke marrë pjesë në fluturimet patrulluese të NATO-s në Poloni.
Portugalia është anëtare e NATO-s, ndërsa Finlanda nuk është.