Investitorët e Gjermanisë notë “zero” Qeverisë së RMV-së, fuqinë punëtore e lavdëruan

Sipërmarrësit e Gjermanisë në Republikën e Maqedonisë së Veriut, Qeverinë e ka vlerësuar me “zero”, sepse sipas tyre ajo ka qenë e koncentruar në politikën e jashtme dhe e ka humbur vëmendjen ndaj ekonomisë. Vlerësime të dobëta kanë marrë reformat tatimore, investimi në arsim, kuadri i pamjaftueshëm i cili u është ofruar ndërmarrjeve të huaja, lufta kundër korrupsionit e cila lidhet me tenderët e pakuptimtë, mungesa e reformave administrative dhe ndryshimet e shpeshta ligjore, transmeton Portalb.mk.

Vlerësim më të lartë ndërmarrjet e Gjermanisë i kanë dhënë fuqisë punëtore, e cila sipas tyre është e përgatitur që të punojë dhe ta përmirësojë produktivitetin, dhe harxhimet që i kanë me punën, edhe pse janë rritur tatimet që lidhen me të.

Sipas tyre, gjendja ekonomike gjatë vitit të kaluar ka qenë edhe më e papërshtatshme. 56 për qind e ndërmarrjeve e kanë vlerësuar si “të keqe”, 39 për qind si “të kënaqshme”, ndërkaq vetëm 5 për qind e tyre e kanë vlerësuar si “të mirë”.

Viti në vijim – investitorët nuk presin ndryshime të mëdha

22 për qind e ndërmarrjeve konsiderojnë se gjendja në sipërmarrësi do të përmirësohet, 54 për qind e tyre nuk presin që të ketë ndryshime të mëdha, ndërkaq 24 për qind e tyre presin përkeqësim të gjendjes.

Përskaj vlerësimeve negative, 75 për qind e sipërmarrësve kanë deklaruar se sërish do të investonin në RMV.

Qeveria e RMV-së ka marrë kritika për sistemin “thashetheme” në rrjete sociale, të cilat kanë ndikuar në punën e ndërmarrjeve, veçanërisht kur publikohen lajme të rreme për ikjen e tyre jashtë shtetit.

Përndryshe, në RMV funksionojnë 201 ndërmarrje me kapital gjerman, të cilët kanë punësuar 20 mijë qytetarë. Shkëmbimi tregtar me Gjermaninë ka arritur vlerën prej 3.64 miliardë euro.

Lajme të ngjashme

Leave a Reply

Your email address will not be published. Required fields are marked *

Back to top button