Në Mal të Zi u miratua Deklarata për bashkëpunim parlamentar të shteteve Adriatik-Joniane
Në Konferencën e 16-të të kryetarëve të Parlamenteve të Nismës Adriatik-Joniane që u mbajt në Budvë të Malit të Zi prej më 18-19 mars 2019, kryetarët – pjesëmarrës në konferencë miratuan deklaratë të përbashkët, transmeton Portalb.mk.
Me Deklaratën e nënshkruar u theksua:
– rëndësia e vazhdimit të bashkëpunimit parlamentar në rajon për realizimin e projekteve për përkrahjen e integrimit të vendeve të Ballkanit Perëndimor në Bashkimin Evropian (BE);
– sektori i turizmit bëhet faktor gjithnjë më i rëndësishëm i përparimit ekonomik të rajonit Adriatik-Jonian me ç’rast inkurajohen vendet anëtare të nismës ta përmirësojnë dimensionin rajonal të bashkëpunimit dhe këmbimit të praktikave më të mira në këtë fushë;
– përkrahet mbështetja politike e aktiviteteve që realizohen në nivelin shtetëror, tejkufitar dhe rajonal në këtë drejtim;
– inkurajohet promovimi i produkteve të përbashkëta turistike me qëllim të pozicionimit të rajonit Adriatik-Jonian si një nga destinimet turistike kryesore në Evropë në favor të se cilës potencohet rëndësia e përparimit të infrastrukturës e cila ka rol esencial në përmirësimin e qasjes dhe ndërlidhjes së rajonit.
Me aktin e nënshkrimit të Deklaratës, ka kryesuar kryetari i Kuvendit të Malit të Zi, Ivan Brajoviq, ndërkaq i pranishëm në të ka qenë edhe kryetari i Kuvendit të Republikës së Maqedonisë së Veriut (RMV), Talat Xhaferi.