Analizat gjenetike të sëmundjeve të trashëguara në llogari të Fondit të shëndetësisë

Analiza për diagnostikë molekulare të sëmundjeve të trashëgueshme do të përfshihet në listën e shërbimeve të cilat do t’i mbulojë Fondi për sigurim shëndetësor. Bëhet fjalë për shtatë shërbime që kërkohen nga Fakulteti i Mjekësisë (departamentet e patologjisë, patofizës, imunologjisë, mjekësisë ligjore), si dhe nga Fakulteti i farmacisë e ASHAM, transmeton Nova, përcjell Portalb.mk. 

“Në këtë mënyrë, do të ndihmojmë zbulimin e hershëm të sëmundjeve të trashëguara dhe atyre malinje, që do të thotë përgjigje më e shpejtë në aspekt të metodave të trajtimit. Më parë, këto ekzaminime i paguanin vetë pacientët, ndërsa prej tani e tutje do të paguajnë vetëm participim për shërbimin. Këto ekzaminime janë shumë specifike dhe për realizimin e tyre nevojitet udhëzim përkatës nga klinikat, pasi të kenë dështuar mundësitë që diagnoza të zbulohet me procedurat standarde”, deklaroi ministri i Shëndetësisë Venko Filipçe.

Metodat NGS (Next Generation Sequences) zbatohen në ASHAM nga viti 2012, dhe ato mundësojnë diagnostikim të shumë sëmundjeve, duke përfshirë edhe sëmundjet e rralla. Me ato, në mënyrë të targetuar bëhet sekuenca e një paneli me 4.800 gjene, që ndërlidhen me sëmundjet e rralla dhe malinje.

“Në këtë mënyrë, e zvogëlojmë nevojën për të dërguar pacientë për diagnostikim jashtë vendit, ndërsa në të njëjtën kohë përshpejtohet koha e reagimit te pacientët”, shtoi Filipçe. Analizat që do të financohen nga FSSH deri tani kanë kushtuar prej 45 deri në 100 mijë denarë.