Reagon iniciativa“Ta Shpëtojmë Kodrën e Diellit”, të rehabilitohen 20 km të rrugës Tetovë-Kodër Dielli dhe jo vetëm 15 km
Iniciativa Qytetare “Ta Shpëtojmë Kodrën e Diellit” ka reaguar dje nëpërmjet një postimi në facebook, në lidhje me rehabilitimin e rrugës Tetovë-Kodër Dielli. Sipas tyre më 1 Mars ka filluar rehabilitim i vetëm 15 km të kësaj rruge, dhe jo gjithsej 20 sa është kjo rrugë. Nga ana tjetër nga “Rrugët e Maqedonisë” thonë se kjo informatë nuk është e vërtetë dhe se do të bëhet rehabilitim i komplet rrugës, njofton Portalb.mk.
Nga Iniciativa thonë se ky është një sukses i vendosshmërisë së tyre për t’ia rikthyer shkëlqimin Kodrës së Diellit. Megjithatë, kërkojnë përgjegjësi nga “Rrugët e Maqedonisë” se përse janë lënë anash 5 km e fundit të rrugës.
Nga ana tjetër Gajur Kadriu, nga “Rrugët e Maqedonisë” tha se kjo informatë nuk është e vërtetë dhe se do të bëhet komplet rehabilitim i rrugës.
“Jo nuk është e vërtetë që do të rehabilitohen vetëm 15 kilometra të rrugës. Rruga do të rehabilitohet komplet”, tha Kadriu.
Ndryshe, Ministri i Ekonomisë, Kreshnik Bekteshi, para ca kohësh, në emisionin Click Plus, tha se janë ndarë mjete dhe se do të bëhet rehabilitim i rrugës, ndërtim dhe zgjerim, vetëm 15 km, dhe se me të njejtin aktivitet do të fillohet në maj të 2019 dhe pritet të përfundohet në shtator të po të njejtit vit.
