Lideri Ahmeti: S’ka përplasje mes partnerëve, qeverisja pa BDI-në është gabim
“Unë mund të ju siguroj të gjithë juve, se nuk ka përplasje mes partnerëve të koalicionit, mund të ketë dallime që nuk e cenojnë as moralin dhe integritetin si të BDI-së, po ashtu edhe të LSDM-së. Tash vendi ka nevojë për më shumë qetësi, komunikim dhe bashkëpunim të forcave politike në pushtet, por edhe të opozitës, sepse jemi në momente të rëndësishme”, kështu ka deklaruar lideri i Bashkimit Demokratik për Integrim (BDI), Ali Ahmeti pas takimit me ministrin e Shqipërisë, Gent Cakajn, transmeton Portalb.mk.
Sa i takon deklaratës së deputetit dhe nënkryetarit të Lidhjes Social Demokrate të Maqedonisë (LSDM), Muhamed Zekiri ku thotë se “qeveria mundet edhe pa BDI-në”, Ahmeti vlerësoi se nëse ndodh kjo, është gabim.
“Nëse mbahet qeveria edhe pa BDI, atëherë mund të them se bëhet shumë gabim. Por do të thoja se kjo është deklaratë e një anëtari të LSDM-së, dhe se nuk mbart përgjegjësinë e Maqedonisë së Veriut”, tha Ahmeti.
Sipas Ahmetit, Maqedonia e Veriut ka prioritete shumë më të mëdha, që lidhen me investimet dhe zhvillimin ekonomik.
Kandidati konsesual presidencial, nesër do të mbahet takimi Zaev – Ahmeti
Paraprakisht, partitë e koalicionit qeverisës së Republikës së Maqedonisë së Veriut kanë sjellë vendim që të dalin me kandidat të përbashkët për zgjedhjet presidenciale të 21-prillit. Ky proces sipas Ahmetit nesër do të marrë epilog, pasi që do të takohet me liderin e LSDM-së, Zoran Zaev.
“Jam i mendimit se kjo çështje do të marrë epilog. Nesër kam takim me Zoran Zaev për t’i dhënë përfundim këtij procesi”, tha Ahmeti.
LEXO: “Imuniteti i Veljanoskit”: Zekiri thotë se qeveria mundet edhe pa BDI-në, Xhaferi s’është pishman
Siç deklaroi nënkryetari i LSDM-së, Muhamed Zekiri, nga LSDM-ja pritet të shqyrtohet edhe mundësia e udhëheqjes së qeverisë pa partinë shqiptare, Bashkimi Demokratik për Integrim (BDI).
“Uroj që nesër ose ditëve në vijim do të mbahet mbledhja e partisë, në të cilën do të duhej të bisedohej për këtë temë. Numrat e bëjnë qeverinë. Sigurisht, derisa i kemi numrat për formimin e Qeverisë pa BDI-në, dhe kjo është opsion, pse jo”, tha Zekiri.
Mollë sherri i partive të koalicionit u bë hedhja në votim e heqjes së imunitetit të deputetit të VMRO-DPMNE-së, Trajko Veljanoskit pas mesnatës, kur edhe kaloi afati sipas Rregullores së Kuvendit. Për këtë nuk është bërë pishman kryetari i Kuvendit, Talat Xhaferi.
