Këngëtari i njohur R.Kelly përballet me akuza për sulm seksual ndaj të miturave
Këngëtari i njohur botëror, fitues i çmimeve Grammy, R. Kelly, është paraqitur në gjykatë në Çikago, në seancën dëgjimore mbi akuzat e sulmeve seksuale ndaj vajzave të mitura, njofton REL.
Robert Kelly, 52 vjeçar, në vitet e fundit është përballur me akuza se ka keqpërdorur seksualisht disa të mitura. Kelly u dorëzua të premten në mbrëmje në polici dhe të shtunën u paraqit në seancën dëgjimore në Gjykatë.
Avokati i këngëtarit, Steven Greenberg, u tha gazetarëve të premten në mbrëmje se “nuk është dashur të nguten në gjykim. Ai është i pafajshëm”.
Në një konferencë të shkurtër për media, u bë e ditur se tri nga katër viktimat e dhunës seksuale ishin nën moshën 17 vjecare dhe këto ngjarje datojnë që nga viti 1998. Nëse Kelly shpallet fajtor, çdo akuzë përmban minimum 10 vjet burgim.