Durrës e Vlorë, era e fortë ndërpreu lundrimet
Për shkak të motit të keq dhe me erë që ka përfshirë qytetin e Vlorës këtë të shtunë është pezulluar lundrimi në det. Era është e fuqishme dhe shkon deri ne 20 m/s ndërsa lartësia e dallgës deri në 8 ballë në det të hapur, njofton Top Channel.
Në gji lartësia e dallgës shkon në 6 ballë. Për këtë arsye trageti i linjës Vlorë-Brindisi ka dalë në Radë dhe ditën e sotme nuk do niset në drejtim të Italisë. Lundrimi i trageteve në det është ndërprerë deri në përmirësimin e kushteve të motit deri në një njoftim të dyte nga autoriteti portual i Vlorës.
Ndërsa në Durrës tragetet e linjës së Barit kanë mbërritur në kohë. Lundrimet janë pezulluar për anijet e peshkimit, pas njoftimit dy ditë më parë të Drejtorisë së përgjithshme detare për përkeqësim të motit në fundjavë.
