Presidenti Thaçi jep detaje nga takimi me liderët dhe ambasadorin Kosnett
Presidenti i vendit Hashim Thaçi ka dhënë detaje rreth takimeve të sotme të zhvilluara me liderët e koalicionit qeveritar por dhe me ambasadorin e SHBA-ve, Philip Kosnett, njofton Klan Kosova.
Në një deklaratë të tij publike ai ka thënë se takimi që pati me Kosnett si dhe liderët e koalicionit pati temë kryesore partneritetin e përjetshëm me SHBA-të.
”Sot, në prezencë të ambasadorit amerikan në Kosovë, Philip S. Kosnett, kam zhvilluar takime të përbashkëta me liderët institucionalë, me kryeparlamentarin Kadri Veseli, kryeministrin Ramush Haradinaj dhe zëvendëskryeministrat Fatmir Limaj e Behgjet Pacolli. Në këto takime kemi biseduar për çështje të rëndësishme shtetërore, për ruajtjen e partneritetit të përjetshëm me SHBA-në dhe për procesin e dialogut Kosovë-Serbi. Interesi shtetëror duhet të bëjë bashkë gjithë spektrin politik, për të marrë vendime të rëndësishme për perspektivën e qytetarëve dhe për të ardhmen tonë euroatlantike, në përputhje me interesat e SHBA-së dhe partnerëve strategjikë të Kosovës. Prandaj, në ditët në vijim, pres vendimmarrje të përgjegjshme në përputhje të plotë me interesat shtetërore. Nuk kemi kohë për të humbur”, shkruan Thaçi