Drejtësi e vonuar

Deri me 30 Janar 2019 Gjykata Supreme duhet të vendosë lidhur me iniciativat e dy avokatëve të cilët e kontestojnë mundësinë e Prokurorisë Speciale për të hapur hetime të reja pasi që ka kaluar afati prej 18 muajsh i përcaktuar në Ligjin për Prokurorinë Speciale. Sikur kjo inicijativë të pranohet, atëherë të gjitha procedurat e reja parahetimore dhe hetimore që PSP i ka ngritur kohëve të fundit, do të bien në ujë dhe funksionarët shtetërorë të involvuar aty nuk do të bartin asnjëherë përgjegjësi për të pabëmat e tyre për të cilat dyshohen.

PSP është një prokurori publike e krijuar me qëllim të caktuar: të zbardhet e vërteta për përgjimin e paligjshëm të mbi 20.000 qytetarëve të këtij shteti dhe të ndiqen penalisht rastet e shkeljes së ligjeve që janë identifikuar në ato përgjime. Punë e një prokurori është të ndjekë krimin. Është obligim i prokurorit që del nga parimi i legalitetit që të ndjekë krimin. Nëse prokurori këtë nuk e bën, atëherë ai vet e then ligjin i cili është shumë i qartë dhe shumë strikt në këtë drejtim. Kështu që, pavarësisht afatit në të cilin PSP duhet të ngrejë aktakuza për të dyshuarit, detyrë e saj është që të hetojë të gjitha rastet tjera që lidhen me përgjimet, dhe këtu nuk ka asnjë dilemë.

Qëllimi i kësaj inicijative të avokatëve mbrojtës të funksionarëve shtetërorë që hetohen nga PSP është që në mënyrë formale të pamundësohet ndjekja e tyre. Pra inicijativa nuk ka të bëjë me dëshmitë që mund të ekzistojnë kundër këtyre personave, nuk ka të bëjë me të vërtetën materiale për atë nëse është kryer ose jo vepër penale, por ka të bëjë me momentin formal se a ka të drejtë PSP të ngrisë hetime të reja pas kalimit të afatit prek 18 muajsh nga pranimi i materialeve deri tek ngritja e akatakuzave. Së pari, nuk mundet që një afat të vlejë për të gjitha lëndët e ngritura nga PSP sepse kjo është absurde. Prokuroria e rregullt ka 18 muaj për të ngritur aktakuzë për secilin rast të veçantë kompleks që ajo e heton. Ka të drejtë që edhe pas këtij afati të ngrisë aktakuze sepse ai afat është vetëm këshillues (fakultativ) dhe jo detyrues (prekluziv). Së dyti, në Ligjin për PSP askund nuk shkruan se ky institucion nuk mund të ngrisë hetime pas afatit prej 18 muajsh. Shkruan që aktakuzat duhet të ngrihen deri ne atë moment, por edhe ky paragraf është tejësisht i kontestueshëm. Kështu që, Gjykata Supreme kur të vendosë lidhur me këtë inicijativë do të krijojë presedan gjithësesi, por pritet të shihet se çfarë presedani do të jetë ai.

Përfundimisht, shumë e rëndësishme është të shqyrtohen rastet e PSP që janë ngritur pas kalimit të mandatit prej 18 muajsh. Por edhe më e rëndësishme është të përfundojnë rastet për të cilat tash më ka aktakuza të ngritura e të cilat janë rastet kryesore të kësaj prokurorie si Target, Titanik, Fortesa, etj. Fatkeqësisht ajo që shohim në këto raste është zhagitje e procedurës, taktizim dhe humbje kohe. Për më tepër, të akuzuar të rëndsishëm u arratisën ndërsa të tjerët u liruan nga paraburgimi. Ky realitet gjithnjë e më tepër ngjan me atë që quhet drejtësi e vonuar. Ndërsa drejtësia e vonuar do të thotë drejtësi e mohuar.

Shkrimi është shkruar enkas për Portalb.mk. Të drejtat e publikimit i kanë vetëm ©Portalb.mk dhe autori, sipas marrëveshjes mes tyre.

Lajme të ngjashme

Leave a Reply

Your email address will not be published. Required fields are marked *

Back to top button