Me gjysmë milionë euro Qeveria do të hapë tre zyra rajonale për tërheqjen e investimeve të huaja

Deri në fund të vitit Qeveria e Republikës së Maqedonisë do të hapë tre zyra rajonale për tërheqjen e investimeve të huaja pasi janë hequr promotorët ekonomikë që i ka vendosur Qeveria e VMRO-DPMNE-së. Në buxhetin për këtë vit për hapjen e këtyre zyrave janë parashikuar 30 milionë denarë ose 500.000 euro, thonë nga Kabineti i zëvendëskryeministrit, Koço Angushev, transmeton Portalb.mk.

Zëvendëskryeministri Angjushev tha nga këto zyra rajonale njëra do të hapet në Shtetet e Bashkuara të Amerikës, me siguri në bregun lindor, e dyta me siguri në Gjermaninë Perëndimore dhe e treta në Lindjen e Afërme. Ai tha se këtë model e kanë vendosu nga shkaku se është më i lirë dhe më funksional. Sipas tij, ka dallim mes modelit paraprak të promotorëve të Maqedonisë dhe nga ai që  propozon tani Qeveria.

“Me modelin paraprak është dërguar promotor maqedonas në shtet të huaj dhe është vënë në paralelizëm me ambasadorin, ata janë zhvendosur në ambasada dhe kishte duel në funksionimin e ambasadave dhe ajo shpesh ka shkaktuar situata të konflikteve. Nga ana tjetër, Maqedonia është e vogël dhe nuk mund të presim që të kërkojnë nga ne, por duhet të dalim dhe të promovohemi. Tani kemi edhe çfarë të promovojmë, kemi Ligj për përkrahje të investimeve në industri dhe kemi program që ta paraqesim”, tha Angjushev.

Ai tha se idenë paraprake që në vend të promotorëve maqedonas në ambasada të emërojnë atashe maqedonase e kanë hedhur sepse sipas dispozitave ligjore për punë të përfaqësuesve diplomatike, atashetë ekonomikë duhet të punësohen në Ministrinë e Brendshme për të paktën dy vjet.

LEXO: Qeveria paralajmëroi më shumë se një miliardë euro investime në infrastrukturën rrugore