Deputeti i ASH-së, Rashidi: Duhet të jepet përgjegjësi pse ligji i gjuhëve një vit mbeti në sirtar (VIDEO)
Deputeti i partisë shqiptare opozitare Aleanca për Shqiptarët, Syrija Rashidi ka theksuar se sot nuk duhet të jetë temë fuqizimi i Ligjit për përdorimin e gjuhëve, por duhet të jepet përgjegjësi se pse i njëjti për një vit qëndroi në sirtarin e Kuvendit të Maqedonisë, transmeton Portalb.mk.
“Mendoj se sot nuk është temë dhe nuk duhet të jetë temë shpallja e ligjit në Gazetën Zyrtare, por edhe temë dhe dilemë se cilat paskan qenë ato kushte të cilat u dashkan të plotësohen që një vit që Ligji të dalë në Gazetën Zyrtare. Është koha e përvetësimit të meritave, sepse qytetarët e kanë të qartë rolin e secilit në procesin e miratimit të Ligjit për Gjuhën Shqipe, por më shumë mendoj se është koha për të dhënë përgjegjësi dhe llogari gjatë ditës së sotme, se pse mbeti një vit në sirtarin e Kuvendit të Maqedonisë. Arsyeja mund të jetë nevoja e përvetësimit të meritave për arsye elektorale për paralajmërimin për zgjedhje, por gjithsesi do të shohim se si do të rrjedhë procesi”, tha Rashidi.
Përndryshe, në numrin shtatë të Gazetës Zyrtare të Republikës së Maqedonisë, sot është publikuar Ligji për Përdorimin e Gjuhëve dhe Ligji për ratifikimin e marrëveshjes përfundimtare Maqedoni – Greqi.
Ndryshe, ligji i gjuhëve në votimin e dytë kaloi më 14 mars, për shkak se i njëjti nuk u dekretua nga presidenti i Maqedonisë, Gjorge Ivanov, por sot është publikuar në Gazetën Zyrtare edhe pse i njëjti u votua dy herë në Kuvendin e Maqedonisë. “Formulën” për mosdrektetim pas votimit të dytë, kryetari Ivanov e zbatoi edhe ndaj marrëveshjes së ratifikuar mes Maqedoni – Greqisë. Për mosdekretim të ligjit edhe pas votimit të dytë, Prokuroria Publike Themelore ka hapur lëndë për presidentin e shtetit, Gjorge Ivanov në të cilën do të veprohet për dy padi penale.
