AI: Vrasja e Khashoggit të jetë subjekt i një hetimi ndërkombëtar

Rasti i gazetarit të vrarë saudit Jamal Khashoggi duhet të bëhet subjekt i një hetimi ndërkombëtar, tha një zyrtare e Amnesty International – Dega në Turqi, raporton Anadolu Agency (AA).

“Vrasja e Khashoggit, e cila ndodhi para syve të gjithë botës, duhet gjithashtu të jetë subjekt i një hetimi ndërkombëtar”, tha në një deklaratë për mediat Göksu Özahıshalı, menaxhere e fushatave të organizatës në Turqi, përpara Konsullatës së Arabisë Saudite në Stamboll, në ditën e 100-të të vrasjes.

Khashoggi u vra dhe u copëtua nga një grup operativësh sauditë pak pasi hyri në konsullatën e vendit në Stamboll më 2 tetor të vitit të kaluar.

Rijadi zyrtar ka ofruar sqarime të ndryshme nga njëra-tjetra në lidhje me vrasjen, duke e mohuar atë fillimisht, ndërsa më pas tha se vrasja ishte aksidentale dhe më në fund iu referua asaj si një operacion jashtë komandës.

Özahıshalı dhe aktivistët e Amnesty International thanë se kërkojnë drejtësi për Khashoggin, i cili ngriti zërin e tij për lirinë e fjalës në botën arabe.

“Autoritetet turke, të cilët filluan një hetim pas rastit Khashoggi, zbuluan se ai u mbyt dhe pastaj u copëtua. Trupi i Khashoggit të vrarë në mënyrë të dhunshme ende nuk është gjetur”, tha ajo.

Në ditën e 100-të që nga vrasja, rruga ku Khashoggi u pa për herë të fundit është emëruar sipas tij, tha Özahıshalı.

“Me këtë aktivitet simbolik, po përsërisim kërkesën tonë për drejtësi për Khashoggin”, shtoi ajo.

Özahıshalı tha se janë të kënaqur me përpjekjet e autoriteteve turke për zbardhjen e rastit.

“Si Amnesty International, edhe një herë kërkojmë nisjen e një hetimi të pavarur të OKB-së për vrasjen dhe torturën ndaj Khashoggit dhe krimet dhe shkeljet e tjera të kryera gjatë vrasjes”, apeloi Özahıshalı.

Ajo tha se vrasja e Khashoggit i ka kthyer sytë e gjithë botës drejt Arabisë Saudite dhe princit të kurorës Mohammad bin Salman.

Özahıshalı e cilësoi hetimin e iniciuar nga autoritetet saudite si shfaqje “për sy e faqe”.

“Ne nuk besojmë se autoritetet saudite, të cilët filluan një shfaqje hetimore për vrasjen, do të kryejnë një proces të drejtë dhe të besueshëm”, vlerësoi Özahıshalı.

Prononcimi para mediave u mbështet edhe nga Erol Önderoğlu, përfaqësuesi i organizatës “Reporterët pa Kufij” në Turqi.

Ndryshe, autoritetet turke kanë përdorur çdo mjet në dispozicion për t’i sjellë përgjegjësit e vrasjes së gazetarit saudit para drejtësisë, duke vazhduar presionin ndërkombëtar.

Pavarësisht faktit se kanë kaluar 100 ditë nga vrasja, Rijadi ka mbajur një qëndrim shqetësues për sa i përket zbulimit të informacioneve lidhur me vrasjen.

Turqia ka thënë në mënyrë të përsëritur se do të kërkojë hetim të rasitit nga OKB, duke shprehur gatishmëri për bashkëpunim.

Lajme të ngjashme

Leave a Reply

Your email address will not be published. Required fields are marked *

Back to top button