Drecun: Shqipëria po e anekson Kosovën

Krijimin e pikave të përbashkëta kufitare ndërmjet Kosovës e Shqipërisë, zyrtari serb Milovan Drecun e ka quajtur heqje kufijsh ndërmjet dy vendeve, transmeton Koha.net.

Lidhur me këtë ai ka thënë se “këta janë hapa që shpien në aneksimin e pjesës së territorit të Serbisë nga Shqipëria”.

“Ky është hap që tregon se ata po punojnë për këtë dhe dëshirojnë që gjithë bashkësinë ndërkombëtare ta vënë para aktit të kryer – ja, ne, hap – pas hapi, po e krijojmë Shqipërinë e madhe dhe askush nuk po reagon që do të thotë se ky nuk është problem i madh. Dhe kur të bëhen llogaritë, një ditë ata do të thonë: ‘E pra, për çfarë të bisedojmë tjetër? Ja, Shqipëria e madhe ekziston’”, citon “blic” i Beogradit të këtë thënë kryetari i të ashtuquajturit këshill për Kosovën në Kuvendin e Serbisë, Drecun.

Ai ka shtuar se Serbia do t’i bëjë të gjitha që në planin diplomatik të tregojë për këtë rrezik.

“Në të kundërtën do ta kemi situatën që bashkimi të ndodhë e që do të thotë se kufiri ndërmjet Shqipërisë e Serbisë do të jetë në Jarinjë e Merdar”, parashikon duke u ankuar Drecun.