Është ndërprerë protesta në Qendrën Klinike, ministri Filipçe caktoi takim me kryeministrin Zaev
Të punësuarit në Qendrat Klinike sot kanë vendosur ta ndërprejnë protestën. Ky vendim vjen pas takimit të djeshëm me ministrin e Shëndetësisë, Venko Filipçe, transmeton Portalb.mk.
Kryetari i Sindikatit të Pavarur i të punësuarve në qendrat klinike, Goran Begoviq tha se në takimin e djeshëm, ministri i Shëndetësisë u ka thënë se do të caktojë takim me kryeministrin e Maqedonisë, Zoran Zaev më 24 ose 25 dhjetor, transmeton Portalb.mk.
Të punësuarit në Klinika protestën e filluan para katër ditësh, pasi Këshilli i Qytetit të Shkupit vendosi që bileta e parkingut të bëhet 800 denarë, në vend të 300 siç ishte deri tani. Ata kërkuan që parkingun ta merr në mbikëqyrje Qendra Klinike.
Filipçe u ka thënë se në bisedë telefonike me kryetarin e Qytetit të Shkupit i kanë shqyrtuar opsionet juridike për kthimin e parkingut në autorizim të Qendrës Klinike, ndërsa Ministria e Shëndetësisë për zgjidhjen e problemit planifikon të ndërtojë dy parkingje me kate.
