MotoGP, rregull i ri për motoçiklistët që kalojnë cakun pa motoçikletë

MotoGP pritet të shpall zyrtarisht një rregull të ri, për mënyrën se si do të klasifikojë motoçiklistët të cilët do të kalojnë vijën e cakut të ndarë nga motoçikleta e tyre, duke e shfuqizuar rregullin e deritanishëm, në bazë të të cilit, për t’u llogaritur si përfundues i garës, ngasësi i motoçikletës duhej të ishte mbi motoçiklëtën e tij, transmeton Anadolu Agency (AA).

Siç bëhet e ditur, rregulli i ri ka marrë ‘dritë jeshile’ në mbledhjen e fundit të Federatës Ndërkombëtare të Motoçiklizmit, (FIM) e cila në një kumtesë të publikuar thotë se nga viti 2019, ngasësit do të klasifikohen si përfundues, pavarësisht nëse ai, ose motoçikleta e tij kalon vijën e cakut duke qenë të ndarë.

“Më parë, në mënyrë që garuesi të kualifikohej si përfundues i garës, duhej të ishte në kontakt me motoçikletën e tij gjatë kalimit të vijës së cakut”, thuhet në kumtesën e FIM-it për vendimin në fjalë, i cili është marrë nga situatat në të kaluarën, kur nga shkaku i aksidenteve, garuesit kanë kaluar vijën e cakut të ndarë nga motoçikleta e tyre, me çka nuk është llogaritur si përfundues i garës.

“Në të ardhmen, koha e përfundimit (të garës) do të përcaktohet nga pjesa e parë ngasësit ose motoçikletës, varësisht kush kalon vijën e cakut”, thuhet në njoftimin e Federatës Ndërkombëtare të Motoçiklizmit.