HRW: Përdhunimi dhe keqtrajtimi i grave, pjesë e përditshmërisë në Korenë Veriore

Rrëfime lemeritëse të përdhunimeve dhe keqtrajtimeve seksuale, të kryera nga zyrtarët shtetërorë verikoreanë ndaj qytetareve të shtetit të tyre, janë paraqitur në një raport të ri, i cili jep detaje për një kulturë, në të cilën zyrtarët bëjnë krime, pa u përballur me ndëshkim, shkruan Koha.net.

Raporti i detajuar 98-faqësh i grupit për mbrojtjen e të drejtave të njeriut, “Human Rights Watch”, që është publikuar të enjten, bazohet në dhjetëra intervista me viktimat e përdhunimeve, që kishin ikur prej Koresë Veriore. Ky raport shpërfaq një shtet që shtyp qytetarët dhe në të cilin zyrtarët – prej policëve dhe rojeve të burgut, e deri tek menaxherët – nuk ndëshkohen kurrë për keqtrajtimin e grave.

“Kontakti i padëshiruar intim dhe dhuna, që është aq e zakonshme në Korenë Veriore ka nisur të pranohet si pjesë e përditshmërisë”, shkruan në raport.