Prokurorja Fatime Fetai kërkoi arrestimin e Nikolla Gruevskit
Ish-kryeministri i Maqedonisë, Nikolla Gruevski sot u vonua në seancën gjyqësore për rastin “Dhuna në Komunën Qendër” dhe për këtë shkak prokurorja publike, Fatime Fetai kërkoi arrestimin e tij, transmeton Portalb.mk.
Fetai në seancë kërkoi arrestimin e Gruevskit duke u bazuar në dispozitat ligjore sipas të cilave: nëse personi i akuzuar rregullisht ftohet, ndërsa nuk paraqitet në seancë dhe nëse nuk e arsyeton mungesën e tij kërkohet arrestim.
I akuzuari, Nikolla Gruevski sot në seancë u vonua 20 minuta.
Ndryshe, së Gjykatën Penale për sot është caktuar seancë e re gjyqësore për rastin e Prokurorisë Speciale Publike “Dhuna në Qendër” në të cilin akuzohen ish-kryeministri Nikolla Gruevski, ish-ministri i Transportit dhe Lidhjeve, Mile Janakieski, ish-këshilltarja e VMRO-DPMNE-së, Daniella Rangellova dhe edhe nëntë persona tjerë.
Në seancat e kaluara për këtë lëndë janë marrë në pyetje tre ish-këshilltarë në komunën Qendër, nga radhët e LSDM-së. Ata dëshmuan se më 10 qershor të vitit 2013 kishte turmë të organizuar të qytetarëve të cilët shanin dhe përdornin fjalë të pahijshme.
Dëshmitarët theksuan se në mesin e pikave të ditës së seancës së pestë të Këshillit të Komunës Qendër nuk kishte pikë për rrënimin e kishës “Shën Konstantini dhe Elena”.
Në seancat paraprake për këtë lëndë, fajin e pranuan i akuzuari i katërt Tomisllav Llazarov dhe i akuzuari i pestë Jordan Ristevski dhe u dënuan me kusht. Për të akuzuarin e shtatë Dimçe Kërstev, po zhvillohet procedurë e ndarë.
Të akuzuarit akuzohen për inkurajim të dhunës që ndodhi gjatë protestave para komunës Qendër në qershor të vitit 2013.
