Qosja: Sali Berisha nuk ka të drejtë të flasë për kufijtë e Kosovës
Akademiku Rexhep Qosja ka hedhur akuza ndaj deklaratave të ish-kryeministrit të Shqipërisë, Sali Berishës, të bëra gjatë takimit me kryetarin e Vetëvendosjes, Albin Kurtin.
Berisha gjatë ditës deklaroi se të gjithë ata që flasin për korrigjim të kufirit apo shkëmbimin e territoreve midis Kosovës e Serbisë, janë argatë të kësaj të fundit, njofton Klan Kosova.
E këto komente, sipas Qosjes, anëtari i Partisë Demokratike të Shqipërisë nuk ka të drejtë t’i bëjë.
“Në qoftë se ka politikan shqiptar që nuk ka të drejtë politike e morale të flasë për çështjen e kufijve të Kosovës ky është para së gjithash Sali Berisha”, ka thënë Qosja në Facebook.
Arsyetimin për këtë, akademiku e bënë për shkak të veprimeve të mëhershme politike të Berishës.
“Sali Berisha në vitet e despotizmit të tij, kur drejtpërdrejt e kur përmes Malit të Zi, duke e thyer embargon e vendosur prej faktorëve ndërkombëtar ndaj Serbisë,me naftën e Shqipërisë e ka furnizuar ushtrinë serbe që masakronte shqiptarë në Kosovë”.
Më tej anëtari Akademisë së Shkencave dhe Arteve të Kosovës u shpreh se çështja e lëvizjes së kufijve të Kosovës është hapur qysh me demarkimin e kufirit me Mailn e Zi.
Ndërsa, për presidentin Hashim Thaçi, Qosja tha se po përdor një diskurs kontradiktor.
“Unë me dëshpërim i dëgjoj e i shikoj në televizione varavingat politike të këtij despoti, i cili atë që e thotë në mesditë e mohon në mbrëmje, e ripohon të nesërmen dhe e mohon sërish në mbrëmje”.
Rexhep Qosja qysh moti është përkrahës i idesë së shkëmbimit të territoreve me Serbinë.