Juventusi investon në teknologji. CR7, imazhi i “Juventus TV”
“Mbyll sytë dhe ëndërro golin tënd të parë në Allianz Stadium”. Kërkesa që të gjithë ëndërrojnë t’i bëjnë Cristiano Ronaldos është në fakt edhe pikënisja e një fushate të re marketingu të “Juventus TV”, kanalit të ri zyrtar dedikuar klubit bardhezi, transmeton Top Channel.
Klubi torinez ka vendosur të rinovohet për sezonin e ri, duke braktisur në këtë mënyrë versionin “Pay TV” për të sjellë një platformë të re “on demand”, të ngjashëm me “Netflix”-in. Në të do të jetë e mundur për të gjithë tifozët bardhezinj të shohin çastet më pikante të ndeshjeve (highlights), intervistat dhe konferencat për shtyp të skuadrës së drejtuar nga Max Allegri.
“Jam i lumtur, ëndërroja të luaja te Juventusi që kur isha fëmijë. Tashmë jam këtu dhe gjithçka duket perfekte. Jam gati dhe i përgatitur për të fituar trofe”.
Këto janë fjalët e para të shprehura nga ish-ylli i Realit të Madridit në kanalin e ri zyrtar të bardhezinjve.
Debutimi i tij me Juventusin do të jetë në Villar Perosa, ku do të pritet me ankth e pasion nga fansat e tij të rinj.
“Dua të falënderoj tifozët që më kanë pritur në një mënyrë fantastike – është shprehur CR7. – Ky është një nga klubet më të rëndësishme në botë, më i rëndësishmi në Itali, ndaj jam i lumtur që jam këtu. Ishte një zgjedhje e lehtë, pasi është një klub i pabesueshëm”.
Për shumëkënd, tratativa me bardhezinjtë ka nisur pikërisht pas duartrokitjeve të dhëna për yllin portugez, pas golit me roveshatë në “Allianz Stadium” në çerekfinalet e Championsit të edicionit të kaluar.
“Ishte një gol i pabesueshëm, por edhe një reagim i pabesueshëm. Nuk më kishte ndodhur kurrë diçka e tillë. Ishte një ndjenjë e bukur. Në fillim u surprizova, por nga ai moment, Juventusi më pëlqeu gjithnjë e më shumë. Nuk besoj se ishte vendimtar për transferimin tim, nuk ishte as elementi që nxiti këtë transferim, por kuptova se këtu e pëlqejnë Cristianon, ndaj u ndieva mirë. Serie A? Shpresoj të përshtatem sa më shpejt, por nuk jam i shqetësuar. Për mua është një sfidë e re dhe unë i adhuroj sfidat”.
