Isa Mustafa pas mospjesëmarrjes së LDK-së në varrimin e Demaçit: Siç thoshte Rugova…
Mirëpo, kryetari i LDK-së përmes një shkrimi në Facebook, nuk e ka ‘qel gojën’ për mospjesëmarrje të anëtarëve të partisë së tij, por e ka quajtur Demaçin disident të pathyeshëm, transmeton Lajmi.net.
“Në këto çaste më bien ndër mend fjalët e Presidentit Rugova i cili thoshte se: “Demaçi është shkrimtar i harmonisë shqiptare dhe njerëzore, humanist i madh””, ka shkruar Mustafa.
Kujtojmë, që të premten nënkryetari i Klinës nga radhët e LDK-së, Besim Hoti, e cilësoi ‘monstrum dhe përçarës’ Adem Demaçin, ndërsa në këtë cilësim mori përkrahjen e deputetëve Naser Rugova e Armend Zemaj.
Shkrimi i plotë i Isa Mustafës:
Kontributi dhe rezistenca e jashtëzakonshme e Adem Demaçit për liri gjatë okupimit serb, do të përkujtohet e do të nderohet brez pas brezi nga qytetarët e Kosovës, por edhe më gjerë.
Baca Adem ishte një disident i pathyeshëm dhe një jokonformist që i duhej botës shqiptare.
Në këto çaste më bien ndër mend fjalët e Presidentit Rugova i cili thoshte se: “Demaçi është shkrimtar i harmonisë shqiptare dhe njerëzore, humanist i madh”.
Andaj, Baca Adem, u prehsh i qetë në dheun e Kosovës së lirë, për të cilën sakrifikove aq shumë! IM
