Koreja e Jugut, vetëvritet deputeti për shkak të akuzave për korrupsion
Deputeti Roh Hoe-chan i cili në Korenë e Jugut njihet me imazhin e sinqert dhe reformist, ka kryer vetëvrasje për shkak të akuzave për korrupsion ndaj tij, transmeton Anadolu Agency (AA).
Sipas agjencisë së lajmeve të Koresë së Jugut Yonhap, deputeti i Partisë së Drejtësisë në opozitë, Roh Hoe-chan, i ka dhënë fund jetës së tij duke kërcyer nga kati i 17-të të një ndërtese në kryeqytetin Seul.
Roh ishte akuzuar të ketë marrë rreth 44 mijë dollarë nga ndihmësi i bloggerit të njohur me pseudonimin “Druking”, i cili është në fokus të skandalit të manipulimeve duke krijuar opinion publik mbi emrat kryesorë në politikën e vendit në internet.
Deputeti në një shënim që ka lënë ka pranuar se ka marrë paratë, porse nuk i ka përdorur për ndonjë veprimtari ilegale politike.
Shkrimtari i blogut “Druking” ishte akuzuar me krijim të bindjeve për çështje specifike politike duke gjeneruar komente në internet në saje të një programi kompjuterik. Marrëdhënia e tij me Partinë Demokratike të presidentit Moon Jae-in dhe politikanë jugokoreanë kishte shkaktuar debate, ndërsa prokuroria kishte nisur hetim në lidhje me rastin.
Koreja e Jugut është ndër vendet me përqindje më të lartë të vetëvrasjeve. Drejtues të kompanive, yjet të muzikës pop dhe politikanë shpesherë kryejnë vetëvrasje.
Ish-presidenti i vendit Roh Moo-hyun në vitin 2009 kishte kryer vetëvrasje pas skandalit të korrupsionit që kishte dalë në pah në lidhje me familjen e tij.
