Mogerini do t’i informojë ministrat e BE-së për emrin, nga OKB, bisedimet transferohen në Bruksel

Maqedonia dhe zhvillimi në bisedimet për emrin do të jetë temat kryesore të seancës së nesërme të Këshillit të Ministrave të Punëve të Jashtme të Bashkimit Evropian, njofton Portalb.mk.

Ministrat e Punëve të Jashtme të BE-së nesër do të mblidhen për Këshillin e rregullt, disa javë përpara Samitit të Qershorit në të cilin liderët evropian duhet që të vendosin për rekomandimin e Komisionit Evropian për fillimin e bisedimeve me Maqedoninë dhe Shqipërinë.

Përfaqësuesja e lartë e Bashkimit Evropian për Politikë të Jashtme dhe Siguri, Federika Mogerini do t’i informojë ministrat e 28 vendeve të BE-së për procesin e bisedimeve, ndërkaq dy ministrat e Punëve të Jashtme të Maqedonisë dhe Greqisë, duhet që të vazhdojnë të bisedojnë në Bruksel, pas raundit të Nju Jorkut.

Është e paralajmëruar se Bullgaria, e cila momentalisht udhëheq me BE-në, bashkë me Austrinë, e cila e merr udhëheqësinë nga 1 qershori do të organizojnë darkë në të cilën do të marrin pjesë ministrat evropian dhe ministri i Punëve të Jashtme Nikolla Dimitrov. Kjo do të jetë mundësi për ministrat evropian që ta pyesin shefin e diplomacisë së Maqedonisë për rrjedhën e bisedimeve me emrin, informojnë burime nga Brukseli.

Nga MPJ-ja e Maqedonisë, kanë paralajmëruar se ministri Dimitrov nesër udhëton për vizitë pune dyditore në Bruksel.`