Koreja e Veriut është gati të flasë me Donald Trump
Koreja e Veriut ka thënë se është ende e gatshme të flasë “në çdo kohë në çfarëdo forme” pasi presidenti i SHBA, Donald Trump anuloi papritmas takimin e tij me Kim Jong-un.
Zëvendësministri i Jashtëm i këtij vendi Kim Kye-gëan tha se vendimi i Trump ishte “jashtëzakonisht i keq”.
Presidenti Trump fajësoi “armiqësinë e hapur” të Veriut për anulimin e takimit, transmeton Klan Kosova.
Samiti do të ishte hera e parë që një president amerikan në detyrë të takonte një udhëheqës të Koresë së Veriut.
Detajet e takimit në Singapor më 12 qershor ishin të paqarta. Por bisedimet do të përqendroheshin në mënyrat e denuklearizimit të gadishullit Korean dhe zvogëlimit të tensioneve, transmeton Klan Kosova.
Vetëm disa orë përpara njoftimit të Trump, Koreja e Veriut tha se realizoi premtimin e saj për shkatërrimin e tuneleve në vendin e vet të testimit bërthamor.
Trump njoftoi anulimin në formën e një letre drejtuar personalisht Kim.
Një zyrtar i lartë i administratës në SHBA më vonë dha detaje të mëtejshme, duke thënë se Koreja e Veriut kishte treguar “një mungesë të thellë të besimit të mirë”.
